MInistru Edukasaun Juventude no Desportu, Armindo Maia

DILI, 23 fevereiru 2021 (TATOLI)—Ministru Edukasaun Joventude no Desportu (MEJD), Armindo Maia labele hasai despaixu-ruma, hodi suspende ka hapara totál atividade eskolár iha Covalima, Bobonaro no Rejiaun Administrativa Espesiál Oe-cuse Ambeno (RAEOA), tanba Dekretu Prezidente Repúblika ba Estadu Emerjénsia da-sanulu la sita kona-bá asuntu ne’e.

“Dekretu PR ne’e la ko’alia kona-bá atu hapara atividade eskola-sira iha fronteira. Tanba ne’e, ita kontinua kumpre saida mak hateten iha dekretu ne’e,” Armindo Maia hateten ba jornalista-sira iha Embaixada Japaun, tersa ne’e.

Notísia Relevante:Pasiente pozitivu COVID-19 iha Fatumean aumenta tan rua

Tanba ne’e nia apela katak, prosesu ensinu aprendizazen ba estudante-sira iha Munisípiu-tolu liña fronteira kontinua la’o nafatin hanesan baibain.

Nia mós rekoñese katak, iha kazu balun ne’ebé MEJD tenke foti medida suspensaun provizóriu ba eskola Ensinu Báziku Filiál Doque de Caxias Bemori no eskola-rua iha Munisípiu Bobonaro tanba kazu esesionál balun.

Governante ne’e hatutan, bainhira Dekretu PR ne’e iha renovasaun no sita suspensaun atividade eskolár iha fronteira, MEJD sei foti desizaun tuir dekretu ne’e haruka.

Entretantu, Prezidente Repúblika, Francisco Guterres Lú Olo, dekreta Estadu Emerjénsia da-sanulu ba loron 30 iha 27 janeiru 2021.

Estadu Emerjénsia da-sanulu ne’e válidu hahú hosi tuku 00.00 iha tersa-feira 2 fevereiru 2021 no termina iha tuku 23.59 kuarta-feira 3 marsu 2021.

Deklarasaun estadu emerjénsia ne’e abranje territóriu nasionál no parsialmente suspende direitu ba sirkulasaun internasionál, liberdade sirkulasaun no fixasaun rezidénsia ba kualkér pontu iha territóriu nasionál, direitu reuniaun no manifestasaun, liberdade ba kultu, no direitu propriedade no inisiativa ekonómika privada.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here