Hafoin hala’o serimónia tomada de pose, Ministru Administrasaun Estatál, Miguel Pereira de Carvalho, hasai retratu hamutuk ho Administradór Munisípiu Aileu, Abel da Conceição. Imejn/Mídia MAE.

DILI, 23 fevereiru 2021 (TATOLI)—Ministru Administrasaun Estatál (MAE), Miguel Pereira de Carvalho, hateten polítika VIII Governu nian mak hakarak hadi’a funsionamentu Administrasaun Lokál Estadu nian, entaun administradór foun tenke ukun tuir enkuadramentu legal sira-ne’ebé regula funsionamentu administrasaun lokál Estadu nian.

Notísia Relevante: Administradór foun tenke promove insentiva partisipasaun sívika konstrutiva

“Hau lori Governu Konstitusionál nia naran, hodi fó pose ba Administrador  foun Munisípiu Aileu nian, katak Politika VIII Governu konstitusionál nian mak hakarak hadi’a funsionamentu Administrasaun Lokál Estadu nian, ne’ebé inklui garante kumprimentu ba enkuadramentu legál ezistente sira-ne’ebé regula funsionamentu administrasaun lokál Estadu nian,” Miguel Pereira de Carvalho hateten iha nia diskursu bainhira fó tomada pose ba Administradór Munisípiu Aileu, Abel da Conceição, ne’ebé Agência TATOLI asesu, tersa ne’e.

Nia hatutan, aktu pose ne’e hahú konkretiza dahuluk iha Timor-Leste hodi  kumprimenta ba Artigu 152 hosi dekretu Lei Nú. 3/2016 ho nia alterasaun sira-ne’ebé aprova estatutu Administrasaun Munisipál, Autoridade Munisipál no Grupu Traballu Tékniku Interministeriál ba Dezentralizasaun Administrativa. 

“Bainhira Dekretu Lei Nú. 3/2016 hahú vigora iha loron 11/03/2016, la prejudika mandatu administradór munisipál sira iha tempu ne’ebá, hodi konklui sira-nia mandatu ne’ebé anteriormente nomeadu hosi Comissão Função Pública (KFP), to’o realiza selesaun pur méritu ba kargu Administradór Munisipál no Prezidente Autoridade Munisipál sira tuir Dekretu Governo Nú. 5/2016,” nia hateten.

Nia dehan, aktu ida-ne’e halo okupante kargu Administradór munisipál no Presidente Autoridade Munisipál sira iha territóriu Timor-Leste, ezerse sira-nia funsaun iha forma de substituisaun durante últimu tinan rua ka tolu. 

Nia haktuir, Konstituisaun Repúblika Demokrátika Timor-Leste determina katak Estadu respeita, iha nia Organizasaun Territoriál, prinsípiu desentralizasaun administrasaun públika.

“Lei fundamentál Repúblika ne mós prevee ezisténsia Podér Lokál ne’ebé konstitui hosi Pesoál, koletiva territóriu, dotada ho orgaun reprezentativu, ho objetivu hodi organiza partisipasaun sidadaun iha solusaun ba sira-nia problema rasik, no promove dezenvolvimentu lokál, sem prejuízu partisipasaun Estadu nian,” Membru Governu ne’e hateten.

Atu konkretiza mandatu konstitusionál ida-ne’e, nia dehan, Governu hala’o reforma administrasaun lokál Estadu hodi introdús estratéjia tranzisaun graduál servisu Administrasaun Munisípiu no Autoridade Munisipál nian ba iha Poder Lokál, liuhosi faze fundamentál tolu.

Nia dehan, faze fundamentál sira mak hanesan deskonsentrasaun administrativa, deszentralizasaun administrativa institusionál, no faze desentralizasaun administrativa territorial. Faze ida-ne’e Administrasaun Munisipál no Autoridade Munisipál sira  sei tranzita ba Administrasaum Autónoma, dependente ba orgaun reprezentativu poder lokál sira.

Nia dehan, Servisu munispál sira sei atua iha ámbitu kompeténsia sira-ne’ebé fó ona ba sira. Kumpre lejislasaun ne’ebé vigór no orientasaun hosi Administradór Munisípiu Aileu liuhosi atividade sira-ne’ebe eskrita ona iha sira-nia respetivu Planu Anuál.

“Servisu Munisipál sira tenke kolabora ba malu no artikula entre iha imi-nia atividade no mós artíkula ho servisu administrasaun sentrál hodi promove atuasaun unitária, integrada no kuerente Administrasaun Públika nian hodi ezekuta PEDN, Programa Governu, Planu Dezenvolvimentu Munisipál no Planu Asaun Anuál,” nia dehan.

Membru Governu ne’e husu ba Administradór Munisípiu Aileu atu koordena, akompaña no avalia atuasaun hosi orgaun no Servisu Administrasaun lokál no garante korespondénsia entre atuasaun sira ho orientasun sira-ne’ebé mai hosi Administrasaun Sentral hodi ezekuta PEDN no Programa Governo nian. 

“Governu iha tinan kotuk, inísia selesaun pur méritu ba kargu Administradór no Prezidente Autoridade Munisípiu sira hodi konkretiza mandatu legál ne’ebé ohin loron ita to’o ona iha faze ida hodi fó pose ba Administradór Munisipál foun Munisípiu Aileu nian,” nia esplika.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here