Transaporte aéreu hosi Indonézia, Transnusa ho númeru 72-600, tun iha Aeroportu Internasionál Prezidente Nicolau Lobato, Comoro. Imajen TATOLI/Egas Cristóvão

DILI, 22 fevereiru 2020 (TATOLI)-VIII Governu Konstitusionál liuhosi ekipa tékniku liña ministeriál, hahú finaliza ona levantamentu dadus ba abitante afetadu sira inklui halo preparasaun lubuk ida hodi hahú konstrusaun Aeroportu Internasionál Prezidente Nicolau Lobato, Comoro, Dili, iha fulan ikus 2021.

Tuir dadus, abitante afetadu hamutuk uma-kain 200-resin mak sei hetan indemnizasaun hosi Governu, hosi suku Beto Tasi, Anin Fuik no Beto Naroman, suku Comoro, postu administrative Dom Aleixo, munisípiu Dili.

“Prosesu konstrusaun foun Aeroportu Comoro la’o hela inklui levantamentu dadus, agora ita sei halo preparasaun lubuk ida. Prosesu sira la’o hela atu aselera projetu ne’e no hein katak laiha impedimentu ruma, ne’ebé pelu menus tinan ne’e nia rohan ita bele halo ona konstrusaun,” Prezidente Aeroportu no Navegasaun Aérea Timor-Leste, Empreza Públika (ANATL,E.P), José Trindade informa iha Otél Golgota, segunda ne’e.

Ekipa liña ministeriál ne’ebé toma konta ba levantamentu dadus no preperasaun sira kompostu hosi Ministériu Transporte no Komunikasaun (MTK), Ministériu Finansa (MF), Ministériu Obra Públika (MTK), Ministériu Agrikultura no Peska (MAP) no Ministériu Justisa (MJ).

Orsamentu ba konstrusaun aeroportu ne’e hosi impréstimu Banku Dezenvolvimentu Aziátiku (ADB, siglá inglés) hamutuk millaun $100 no Governu mós aloka ona millaun $30, ne’ebé orsamentu ne’ebé iha hamutuk millaun $130, enkuantutanba konstrusaun ne’e sei presiza millaun $480.

“Planu atu konstrui aeroportu ne’e tomak ho komprensivu komesa hosi pista, torre no terminál purvolta millaun $480,” nia akresenta.

Enkuantu, Governu Japaun mós kontinua hatudu kompromisu apoia osan millaun $44 hodi konstrui komponente lima Aeroportu Comoro hanesan terminál ba pasajeiru, torre kontrolu tax way, access road inklui fatin para aviaun.

Iha prosesu kontrusaun, ANATL,EP sei haree iha nesesidade atu muda provizóriu servisu portuáriu Comoro ba Aeroportu Komandante ein Xefe FALINTIL, Kay Rala Xanana Gusmão no Aeroportu Internasionál Rota do Sândalo iha Rejiaun Administrativu Espesiál Oé-cusse Ambeno (RAEOA).

“Ita sei haree halo jestaun, karik iha nesesidade bele muda aviaun tun fali iha aeroportu rua ne’e, tanba bainhira konstrusaun ita taka parte balun no loke parte balun,” Dirijente ne’e katak.

Antes ne’e, Ministru Transporte no Komunikasaun, José Agostinho da Silva, informa ekipa servisu interministeriál ba planu mestre hatudu progresu di’ak ona atu aselera lalais konstrusaun Aeroportu Comoro ho kualidade di’ak tuir padraun internasionál.

Jornalista: Florêncio Miranda Ximenes

Editora: Julia Chatarina

1 KOMENTÁRIU

  1. Aero porto hanesan odematan boot Nasaun nian importante tebes ba ita nia rain,Dalan diak ba dezemvolvimento hahu husi portu no aero portu tamba iha buat barak maka tama mai liu husi fatin rua nee,imajina took karik fatin rua nee laiha saida maka akontese iha ita nia nasaun?tamba nee maka ami povu kiik kontenti tebes ho planu guvernu nian nee no husu atu realija lalais…..

HAKEREK NO HATÁN

Please enter your comment!
Please enter your name here