Koordenadór Gabinete Apoiu Sosiedade Sivíl, Filipe da Costa. Imajen Tatoli/Egas Cristovão

DILI, 22 fevereiru 2021 (TATOLI)—Koordenadór Gabinete Apoiu Sosiedade Civil (GASC), Filipe da Costa, hateten mánutrisaun iha Timor-Leste aas tebes tanba raes (badak) kontinua iha, entaun afeta ba seguransa ai-han iha Timor-Leste ne’e grave.

Notísia Relevante: Presiza ema hotu nia kontribuisaun hadi’a mánutrisaun iha Timor-Leste

“Iha ita-nia rain forma sira ne’ebé liga ho mánutrisaun ne’e, aas tebes. Hanesan raes ka badak, ita sei iha 47.1%. Ne’e hautudu katak ita iha mánutrisaun ne’ebé mak aas. Ita iha dadus sira-ne’ebé mak ko’alia kona-ba inseguransa ai-han, ita iha 36%. Entaun, seguransa ai-han iha Timor-Leste grave,” Filipe da Costa hatete ba jornalista sira ha salaun FONGTIL, Caicoli, Dili, segunda ne’e.

Atu redús, nia hatutan, tenke servisu hamutuk ho multisetorál entaun Ministériu Edukasaun nia papél la’ós de’it merenda eskolár maibé hasa’e ema-nia kuñesimentu kona-ba ai-han nutritivu, hanesan mós ho agrikultura inklui saúde no setór sira seluk.

“Tanba ne’e mak ha’u dehan ita presiza servisu hamutuk hodi implementa programa prioridade ne’ebé mak ita define ona,” nia hateten.

Bainhira Timor-Leste tama ona ba SUN Moviment, nia dehan, sira finaliza ona planu asaun ba SUN Movement ne’e tanba planu ne’e GASC konsulta ona ho liña ministeriál inklui ho péritu no ajénsia nasionál no internasionál sira. Nia dehan, dokumentu kona-ba SUN Moviment ne’e haruka ona ba Genevra no sira iha feedback kapaas loos.

“Ita espera katak, iha tempu badak ita sei aprezenta ba Konsellu Ministru, atu bele hetan aprovasaun,” nia hateten.

Maibé, nia dehan, dezafiu mak rekursu umanu ne’ebé atu investe lalais no atu bele atinje rezultadu ne’e la sufusiente.

“Ita tenke jere ita-nia rekursu umanu no limitasaun hirak ne’ebé iha. Dezafiu seluk mak ema-nia kuñesimentu. Ita tenke fahe informasaun loloos para hasa’e ema-nia kuñesementu,” Filipe hateten.

Aleinde ida ne’e, nia esplika, iha mós dezafiu kona-ba jeografikamente tanba oinsá mak prodús ai-han sufisiente no asesu ai-han ho di’ak, no ai-han tenke disponibilidade estabilidade hodi labele fulan ida iha no fulan ida laiha.

“Maibé, ho ida-ne’e, ha’u fiar ita sei atinje ita-nia meta, atu tau iha nutrisaun di’ak no ai-han seguru ba ita-nia komunidade hotu-hotu. Maske rekursu ne’ebé natón maibé importante mak servisu hamutuk ho di’ak liután. Tanba ha’u fiar ho rekursu natón bele luta redús mánutrisaun iha ita-nia rain,” nia esplika.

Jornalista: Osória Marques

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here