Ajudus Humanitaria ekipamentu mediku nian husi Kambodia bainhira to ho abiaun Cambodia Airways iha aeroportu internasional Nicolao Lobato Dili, Kuarta 2/12/2020. Imajen Tatoli/Antonio Goncalves

DILI, 22 fevereiru 2021 (TATOLI)—Reseita Aeroportu no Navegasaun Aérea Timor-Leste, Empreza Públika (ANATL,E.P) hahú tinan 2020 no 2021 tun tanba situasaun COVID-19 ne’ebé afeta ba mundu tomak inklui Timor-Leste.

Tuir Prezidente ANATL, José Trindade, situasaun ne’e afeta tebes ba redimentu aeroportu tanba movimentu aviaun ho ema  kuaze laiha, haree mós ba kondisaun Estadu Emerjénsia.

Iha tinan 2020, servisu Aeroportu no Navegasaun Aérea iha projesaun atu hetan reseita millaun $3-resin, maibé tanba situasaun COVID-19, konsege kobre reseita millaun $-resin.

“Ita haree komesa hosi tinan 2020 no 2021, reseita tun liután, tanba iha fulan janeiru 2021 nian seidauk to’o $20.000, enkuantu ami tenke finansia kustu rekorrente sira kada fulan $160.000 to’o $175.000, maibé reseita ne’ebé ami rekolla la to’o,” Prezidente empreza estatál ne’e informa, iha Otél Golgota, Comoro, segunda ne’e.

Enkuantu, iha Orsamentu Jerál Estadu (OJE) 2020 prevee $623.000 ba funsiona no servisu ANATL,E.P.

Maibé iha tinan 2020 nia laran, tanba situasaun Estadu Emerjénsia hahú marsu limita movimentu aviaun, enkuantu ANATL hanesan empreza públika iha responsabilidade ba jestaun no operadór aeroportu iha Timór laran tomak.

Iha sorin seluk, Prezidente ANATL informa daudaun ne’e preparasaun Timor-Leste atu hetan sertifikadu hosi International Civil Aviation Organization (ICAO) atinje ona 80% no hein de’it avaliasaun.

Kritériu hetan sertifikadu ICAO maka funsionáriu ANATL,EP presiza iha abilidade iha área dezenvolvimentu no manutensaun aeroportu, jestaun finanseiru ba aeroportu, sistema jestaun seguransa no jestaun aeroportu.

Funsionáriu sira hetan kapasitasaun hodi bele halo’o knaar ho di’ak, liuliu iha kapasidade ba jestaun iha áreoportu atu hetan sertifikasaun aeroportu hosi ICAO,” nia akresenta.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here