Prezidente Parlamentu Nasionál, Aniceto Longuinhos Guterres Lopez.

DILI, 22 fevereiru 2021 (TATOLI)—Parlamentu Nasionál, ohin, aprova ona proposta-lei kona-ba rejime jurídiku arbitrajen voluntária iha finál globál ne’ebé altera ona artigu balun hosi Kódigu Prosesu Sivíl (CPC-sigla portugés).

Notísia Relevante: Ohin, PN aprova proposta-lei arbitrajen voluntária iha finál globál

Proposta-lei númeru 11/V(2a) kona-ba rejime jurídiku ba arbitrajen voluntária no prosede primeira alterasaun Kódigu Prosesu Sivíl (CPC-sigla portugés) aprovadu iha finál global ho rezultadu votasaun a-favór 36, kontra 6 no abstensaun 5.

“Ho nune’e rejime jurídiku ba arbitrajen voluntária no prosede primeira alterasaun Kódigu Prosesu Sivíl aprovadu,” Prezidente Parlamentu Nasionál, Deputadu Aniceto Longuinhos Guterres Lopes, anúnsia liuhosi plenária, Parlamentu Nasionál.

Iha inisiativa lejizlativa ne’e komposta hosi artigu 5 no anexu 1. Artigu 1 (objetu) indika objevu lei hodi halo aprovasaun ba rejime jurídiku arbitrajen voluntária. Artigu 2 mak deskreve alterasaun ba 671 no 694 hosi Kódigu Prosesu Sivíl.

Artigu 3 kona-ba normativu hodi revoga  artigu 679 númeru 2 no artigu 841hosi Kódigu Prosesu Sivíl. Artigu 4 kona-ba norma tranzitória, ne’ebé determina rejime arbitrajen voluntária sei aplika ba prosesu arbitrál sira no artigu 5 (entraga ein-vigór) ne’ebé prevee lei bainhira públika iha Jornál Repúblika.

Proposta-lei iha anexu 1 komposta hosi kapítulu hamutuk XI. Kapítulu I ko’alia kona-ba dispozisaun jerál, kapítulu II ko’alia kona-ba konvensaun arbitrajen, kapítulu III ko’alia kona-ba konstituisaun tribunál arbitrál, kapítulu IV ko’alia kona-ba rekizitu, devér, responsabilidade no direitu árbitru sira.

Nune’e mós kapítulu V ko’alia kona-ba kompeténsia tribunál arbitrál, kapítulu VI ko’alia kona-ba medida provizória no orden preliminár sira.

Kapítulu VII ko’alia kona-ba inísiu, kondusaun no dezenvolvimentu iha prosesu arbitrál, kapítulu VIII ko’alia kona-ba sentensa arbitrál no prosesu ikus.

Kapítulu IX ko’alia kona-ba impugnasaun sentensa arbitrál iha tribunál judisiál, kapítulu X ko’alia kona-ba ezekusaun sentensa arbitrál nasionál nasionál hosi tribunál judisiál no kapítulu XI sita konfirmasaun no ezekusaun sentensa arbitrál estranjeira.

Notísia Relevante: Komisaun A sei diskute proposta-lei arbitrajen voluntária ba justisa iha Aileu

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here