Ministru Administrasaun Estatál, Miguel Pereira de Carvalho. Imajen TATOLI/Egas Cristóvão

DILI, 22 fevereiru 2021 (TATOLI)–Ministériu Administrasaun Estatál (MAE) no Ministériu Koordenadór Asuntu Ekonómiku (MKAE), hamutuk ho ajénsia sira ne’ebé tutela tau idea hamutuk implementa dekretu-lei númeru 3/2016 kona-ba estatutu administrasaun no autoridade munisipál.

Ministru Administrasaun Estatál, Miguel de Carvalho, hateten reuniaun ne’e parte ida atu reforsa administrasaun lokál Estadu no iha sorin seluk MAE halo hela ezersísiu ida hamutuk ho ministériu relavante sira iha Governu sentrál atubele garante komprimentu regra estabelesidu iha dekretu-lei númeru 3/2016 kona-ba estatutu administrasaun no autoridade munisipál.

“Iha kontestu ida-ne’e, Governu sentrál presiza garante katak kompeténsia ne’ebé hatuur ona iha dekretu lei númeru 3/2016 kona-ba deskonsentra ba munisípiu sira tenke finansia, tau rekursu umanu no mós rekursu finanseira, nune’e munisípiu sira bele iha kapasidade natoon atubele hala’o funsaun Estadu hotu ne’ebé deskonsentra ona ba munisípiu sira,” Ministru Miguel relata hafoin ramata reuniaun ho MKAE iha salaun TradeInvest, segunda ne’e.

Dekretu-lei ne’e hanesan meiu ida atu evita ema halo urbanizasaun maka’as liután ba sidade Dili, tanba ne’e presiza kapasita munisípiu sira atu iha kapasidade no orsamentu natoon halo dezenvolvimentu.

“Bainhira iha rekursu natoon iha munisípiu sira maka bele halo ema kontinua mantein iha munisípiu atubele kontribui ba dezenvolvimentu iha sira-nia munisípiu,” nia akresenta.

Ho hanoin hirak ne’e maka MKAE hamutuk ho Sekretaria Estadu tolu inklui MAE, konvoka reuniaun atu partilla polítika Governu relasionadu ho deskonsentrasaun no desentralizasaun administrativa, inklui estratéjia saida de’it maka Governu iha ona atu fazeadamente deskonsentra poder no mós ba oin atu desentraliza poder ba munisípiu atu iha entendimentu hanesan nível Governu sentrál.

“Enkontru ne’e, husu apoiu polítika membru Governu relevante sira nune’e iha tinan 2022, entidade Governu sentrál hotu bele deskonsentra poder barak liután ba munisípiu sira inklui deskonsentra kapasidade finanseira ne’ebé daudaun ne’e sentraliza iha Governu sentrál ba munisípiu sira, nune’e sira bele iha kapasidade natoon presta serbisu ba populasaun sira,” nia hatutan.

Governante ne’e nota katak realidade populasaun barak liu mak hela iha munisípiu no postu sira, maibé dezenvolvimentu mínimu tebes, ne’e tanba jestaun administrasaun públiku sira barak liu iha nível sentrál no sentrál mak tun direta ba postu sira.

Maibé, agora kontráriu katak munisípiu, postu no suku sira maka halo serbisu, enkuantu Governu sentrál tau rekursu finanseiru no reforsa rekursu umanu.

Biban ne’e, MKAE espresa sira-nia apoiu tantu tékniku no polítiku ba MAE iha ámbitu reforma ida-ne’e no komprometidu atubele tau ba ba planu 2022, hodi reforsa kapasidade munisípiu, maibé ko’alia mós kona-ba posibilidade liuhosi akordu entre orgánika delegasaun kompeténsia deskonsentra poder balun ba munisípiu sira ne’ebé mak kompeténsia MKAE nian.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here