Plenária Parlamento Nasionál. Imajen TATOLI/Egas Cristovão.

DILI, 22 fevereiru 2021 (TATOLI)—Komisaun F ne’ebé trata asuntu saúde, seguransa sosiál no igualdade jéneru, rekomenda ba Governu liuhosi Ministériu ba Asuntu Antigu Kombatente no Libertasaun Nasionál (MAKLN) atu haree didi’ak dekretu-lei númeru 7/2018 tanba komisáriu no membru konsellu veteranu sira laiha saláriu.

Komisaun F identifika kestaun ne’e bainhira hala’o fiskalizasaun ba munisípiu Liquiçá iha loron 29 to’o 30 outubru 2020 liubá.

“Rekomenda ba Ministériu ba Asuntu Antigu Kombatente no Libertasaun Nasionál atu haree didi’ak dekretu-lei númeru 7/2018 kona-ba komisáriu no membru konsellu veteranu sira-nia regalia tanba sira-nia mandatu ba tinan lima maibé laiha saláriu,” Sekretária Meza Komisaun F, Deputada Helena Martins Belo, ne’ebé akompaña hosi Prezidente Komisaun F, Deputadu Noe da Silva Ximenes “Buka-Tuir”, aprezenta relatóriu vizita fiskalizasaun ba plenária Parlamentu Nasionál, segunda ne’e.

Komisaun F mós rekomenda ba Ministériu ba Asuntu Antigu Kombatente no Libertasaun Nasionál atu estabelese sede iha nasionál no mós munisípiu sira.

Iha aprezentasaun relatóriu vizita fiskalizasaun ne’e hateten, Konsellu veteranu la hamriik mesak maibé bazea ba lei númeru 3/2006, hetan alterasaun ba lei númeru 9/2009 no iha 2011 hetan alterasaun ba lei númeru 2/2011 no lei tolu ne’e hetan tán dekretu-lei númeru 7/2018, maibé lei sira-ne’e iha vantajen no dezvantajen ba veteranu sira.

Komisaun F nota veteranu munisípiu Liquiçá seidauk iha sede própriu hodi hala’o servisu, maibé bazeia ba dekretu-lei númeru 7/2018 atu estabelese sede iha nasionál no mós munisípiu sira.

Nune’e mós veteranu sira hasoru difikuldade seluk mak hanesan veteranu balun hetan pensaun no balun sei iha prosesu nia laran atu hetan pensaun.

“Saláriu ba komisáriu konsellu veteranu sira laiha bazea ba dekretu-lei númeru 7/2018, maibé komisáriu sira-nia mandatu ba tinan lima. Bainhira sira ba halo enkontru iha munisípiu mak hetan perdiem kada loron $40 dolar. Sira-nia mandatu tinan lima ne’e bele ka lae hetan abonu ruma,” Komisaun F rekomenda iha relatóriu fiskalizasaun polítika ne’e.

Komisaun F mós rekomenda ba reprezentante povu sira iha uma fukun Parlamentu Nasionál atu informa ba Governu atu haree didi’ak diploma ne’e.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here