Komandante Jerál PNTL, Komisáriu Faustino da Costa, Konvoka enkontru kona-ba planu asaun Polisiamentu Komunitáriu ho Komandante munisípiu 12 inklui RAEOA, iha salaun Tower, Fatuhada, segunda (22/02). Imajen TATOLI/Egas Cristóvão

DILI, 22 fevereiru 2021 (TATOLI)–Komandandu Jerál Polísia Nasionál Timor-Leste (PNTL) hala’o enkontru ho komandante munisípiu sira hodi diskute hamutuk planu atividade Polisiamentu Komunitáriu ba asuntu prevensaun krime iha munisípiu sira hotu.

“Serbisu Polisiamentu Komunitáriu daudaun ne’e la’o di’ak tebes, tanba ne’e Komandante munisípiu sira presiza halo planu hodi bele haforsa polítika implementasaun. Enkontru ne’e nu’udar kontinuasaun ne’ebé antes ne’e Komadante Jerál PNTL halo ona ho Komadante munisípiu atu haree kona-ba kestaun implementasaun,” Komadante Jerál PNTL, Komisáriu Faustino da Costa, informa iha Tower, Fatuhada, segunda ne’e.

Komandante Jerál PNTL, Komísariu Faustino da Costa. Imajen TATOLI/Egas Cristóvão

Tuir Komisáriu Faustino, daudaun iha faze formaliza regra interna PNTL ne’ebé hanaran ‘norma organizasaun no prosedimentu’, nune’e komandante ida-idak bele identifika problema iha munisípiu hafoin koloka ba prioridade.

Hafoin koloka prioridade, Komandante munisipál sira aprova hafoin sei hato’o ba nível nasionál hodi distribui filafali ba komandante hodi implementa no parte relevante Governu inklui parseiru dezenvolvimentu bele fó apoia.

Tanba ne’e, Komandate Jerál PNTL husu Komadante munisípiu sira hodi halo koordenasaun di’ak ho Prezidente Autoridade sira atu haree no identifika programa, planu asaun no problema sira iha munisípiu.

“Ita hatene polítikamente Prezidente Autoridade balun foun, tanba ne’e Komadante munisípiu sira presiza hakbesik hodi halo diskusaun ba programa, liga ho nesesidade sira ba implementasaun Polísiamentu Komunitária,” nia hatutan.

Iha fatin hanesan, Komadante PNTL munisípiu Lautém, Superintendente Xefe Polísia Antóninho Fernandes, hateten nu’udar Komadante munisípiu, nia parte sei halo koordenasaun ho Administradór foun, ne’ebé sei halo enkontru Konsellu Seguransa Munisípiu hodi ko’alia kona-ba polítika implementasaun Polisiamentu Komunitáriu.

Komunidade sira apresia ezisténisa Polisiamentu Komunitáriu iha suku, ne’ebé bele rezolve problema ho natureza semi públiku no mós kazu sivíl.

Nune’e mós, Team Leader Programme hosi Asia Fundation, Aderito Tilman, louva tebes programa implementasaun  KPK tanba haree husi prespetiva jere programa ne’e Komandu PNTL jere ho di’ak.

Jornalista: Natalino Costa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here