Hakerek nain, Alipio De Almeida (Médiku Veterináriu).

Hosi:

Alipio De Almeida

Membru Asosiasaun Médiku Veterináriu Timor-Leste

Hanesan ita hotu hatene moras African Swine Fever (ASF) ka Peste Suína Africana konfirmadu eziste iha ita nia nasaun Tmor-Leste hahú fulan-setembru 2019.  Maske moras refere kategoria moras foun ba ita nia nasaun, faktu; moras ne’e tuan ona iha mundu, tanba hahú deskobre iha 1910, iha nasaun Kénia. Husi ne’ebá virus refere transmite ba nasaun sira Afrika nian no tama iha Portugal iha 1957. Husi ne’ebá maka virus ASF transmite ba nasaun barak iha mundu inklui Europea no Ázia.

Oinsá moras ASF bele tama iha Timor-Leste?

Depois Timor-Leste husik husi Indonézia iha 1999, husi ne’ebá kedas Organizasaun Nasoins Unidas (ONU) nia ema barak tama iha Timor. Produsaun hahán iha rai laran ne’ebé menus, nesesita tebes hodi halo importasaun hahán husi nasaun seluk hodi prenxe nesesidade bázika ema nian. Ho atividade importasun hahán husi rai liur ne’ebé akontese nafatin to’o ohin loron maka lori virus ASF.

Atividade importasaun ne’ebé la akompaña ho servisu bio-seguransa nasaun nian ne’ebé di’ak, tanba limitasaun meiu hodi halo teste ba ai-han ne’ebé tama, nune’e mos seidauk iha ekipamentu hanesan laboratóriu ne’ebé adekuadu, aumenta ho koñesementu ema bai-bain ne’ebé menus kona-ba moras iha animál nian inklui agrikultór ne’ebé hakiak balada fahi kontribui ba transmisaun ASF iha Timor-Leste laran tomak. Husi ne’e, ita nia balada fahi barak mak mate no agrikultór ne’ebé hakiak fahi lakon nia rendementu, tanba produsaun fahi ne’ebé utiliza ba nesesidade uma kain nian kuaze mate hotu.

Jestaun saida mak ita tenke halo?

Jeralmente, jestaun saúde ba ita nia balada fahi atu labele kona moras ASF maka tenke halo prevensaun. Maibé ita mos hatene katak to’o loron ohin, seidauk iha vasina ba moras ASF. Tanba ne’e, to’o loron ohin, métodu úniku hodi halo prevensaun atu balada fahi labele kona moras ASF maka bio-seguransa. Bio-seguransa ne’e métodu úniku, tanba virus ASF ne’e to’o agora seidauk iha vasina no aimoruk hodi halo tratamentu kuandu balada fahi moras ona.

Saida maka bio-seguransa iha atividade hakiak fahi nian?

Jeralmente, iha definisaun barak kona-ba saida mak bio-seguransa. Maibé, rezume badak ba agrikultór, liu-liu hakiak nain sira katak bio-seguransa maka prosedimentu ka asaun ne’ebé ita dezeña hodi proteje ita nia balada fahi husi substánsia biolójiku no biokímiku sira ne’ebé perigu ba ita nia fahi.

Asaun bio-seguransa ne’ebé nu’udar agrikultór, liu-liu hakiak nain sira tenke halo atu bele proteje ita ida-idak nia balade fahi husi moras ASF maka hanesan tuir mai ne’e:

1. Balada fahi tenke iha nia luhan; signifika ita hakiak labele husik iha rai liur. Animál refere tenke iha luhan laran de’it durante nia moris. Nesesidade fahi nian ita nain mak tenke prenxe. Hahú husi hahán, bee hemu, fase no hamoos luhan, fó kaben, fó hahoris, maneza nia saúde se-karik moras no seluk-seluk tan.

2. Luhan ba fahi tenke kumpletu ho fasilidade hamoos no fase luhan nian, inklui bee, aisar, eskoba, no seluk-seluk tan. Nune’e, ita tenke fase ita nia balada fahi nia luhan bebeik atu luhan labele iha foer husi fahi nia foer no hahán restu sira.

3. Tenke iha desinfektansia hodi hamoos luhan ho ekipamentu luhan nian. Nune’e, ita nia fahi nia luhan bele livre husi ajente virus ASF.

4. Balada fahi nia luhan presiza iha lutu hale’u atu bele proteje ita nia balada fahi ho nia ekipamentu luhan laran nian husi balada fuik sira hanesan fahi fuik no asu, no ema seluk ne’ebé la nesesita ba luhan.

5. Tenke iha roupa espesifiku ne’ebé so hatais ba ita nia balada fahi nia luhan de’it. Roupa ne’ebé hatais ba balada fahi nia luhan labele utiliza iha fatin seluk. Roupa espesifiku ne’e so hatais durante hala’o atividade iha balada fahi nia luhan laran no aredór luhan nian de’it.

6. Tenke iha fatin ida hodi rai roupa ne’ebé ita hatais no labele kahur ho roupa sira seluk.

7. Tenke fase ita nia liman, ain no seluk-seluk tan inklui sapatu ka sinelus antes tama ba luhan iha tempu fó han, fó hemu, fase luhan, no atividade saida de’it mak hala’o iha luhan.

8. Labele iha movimentu iha luhan ho nia aredór sira atu ita nia balada fahi hakmatek iha nia luhan.

9. Sasan seluk ruma ne’ebé tenke ba duni luhan, tenke desinfekta tiha antes.

10. Labele iha tráfiku animál liu-liu balada fahi iha luhan ho nia aredór sira bainhira iha fahi ruma moras no mate.

11. Karik iha balada fahi ruma mak mate, tenke hakoi iha rai laran.

12. Labele fó hahán ne’ebé diskunfia kontamina ho virus ASF, liu-liu hahán ne’ebé mai husi restorante ne’ebé dalaruma iha na’an fahi kontaminadu.

13. Proteje ita nia balada fahi nia luhan atu labele iha lalar. Tanba lalar bele lori moras husi fatin ida ba fatin seluk.

14. Fó aimoruk antiparazita ba balada fahi atu halakon tiha parazita ne’ebé moris iha fatin nia isin liur ho laran. Antiparazita ne’e bele fó dahuluk no repete iha semana rua tuir mai no kontinua kada fulan neen.

15. Labele autoriza ema seluk atu tama iha fahi nia luhan, kuandu ema refere la halo tuir asaun bio-seguransa ne’ebé aplika iha ita nia atividade loro-loron hakiak fahi nian.

Atu konklui; nu’udar agrikultór hakiak fahi tenke tau prioridade ba bio-seguransa, hodi prevene moras ASF.

Hakerek nain nu’udar dosente no mós formadór agrikultór sira ne’ebé hakiak animál iha Timor-Leste.

HAKEREK NO HATÁN

Please enter your comment!
Please enter your name here