Komunidade iha suku Comoro, kapitál Dili, troka voucher iha supermerkadu Leader ho produtu Cesta Bázika, kinta (10/12). Imajen TATOLI/António Gonçalves

DILI, 22 fevereiru 2021 (TATOLI)Sekretariadu Tékniku Programa Cesta Bázika lidera hosi  Ministériu Koordenadór Asuntu Ekonómiku (MKAE) hamutuk ho Sekretariadu Fundu COVID-19 hosi Ministériu Finansa (MF), finaliza ona diskusaun medida pagamentu ba fornesedór programa ne’ebé sei realiza iha tempu besik.

Ministériu no ajente responsável sira hosi programa Cesta Bázika mak hanesan Ministériu Agrikultura no Peska (MAP), Ministériu Turizmu, Komérsiu no Indústria (MTKI), Sekretaria Estadu Kooperativa (SEKoop) no Sentru Lojíztika Nasional (CLN, sigla portugés).

“Ajente implementadór bele prepara ona dokumentu kona-ba pedidu pagamentu”, Koordenadór Jerál Sekretaria Téknika Cesta Básiza, Osório Florindo, hateten hafoin ramata reuniaun iha salaun TradeInvest, Colmera, segunda ne’e.

Ministériu implementadór ajudika direta kompañia distributór Cesta Bázika hamutuk 173.

Bazeia ba dekretu-lei númeru 48/2020, 07 outubru, kona-ba medida apoiu família, atribuisaun Cesta Bázika, operadór ekonómika lokál iha ámbitu planu rekuperasaun ekonómika no kria rejime espesiál aprovizionamentu ba efeitu, iha artigu 10 kona-ba modalidade aprovizionamentu, temi katak aprovizionametu ba akizisaun produtu Cesta Bázika realiza bazeia ba modalidade ajudikasaun direta to’o limite verba ne’ebé aloka ba entidade ajudikante ne’ebé ministériu indika ona.

Programa Governu iha kurtu prazu ne’e inisia iha novembru 2020 no kontinua iha janeiru 2021 to’o ohin loron, ne’ebé provizóriu benefisia ona populasaun hamutuk 823.916 (ekivalente 63,4%) hosi totál millaun $1,5.

Programa Cesta Bázika rasik nu’udar medida  restrisaun iha ámbitu  luta kontra surtu  COVID-19, hodi salva no proteje funsionamentu ekonomia ho ninia objetivu hodi kria kondisaun liuhosi aumenta rendimentu agrikultór sira inklui apoia família ho nesesidade bázika no estimula  ekonomia lokál iha ámbitu Planu Rekuperasaun Ekonomia.

Sekretaria Tékniku harii bazeia ba dekretu-lei númeru  48 /2020 loron 07 outubru ho ninia funsaun fó apoiu ba MKAE kona-ba aplikasaun programa Cesta Bázika hanesan dezenvolve prosedimentu administrativu no tékniku hodi  apoiu prosesu distribuisaun inklui mós halo  avaliasaun kona-ba relatóriu ezekusaun distribuisaun.

Jornalista Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here