Ilustrasaun.

DILI, 22 fevereiru 2021 (TATOLI)—Grupu Feto Parlamentár Feto Timor-Leste (GMPTL-sigla portugés) deteta fatór lima (5) ne’ebé bele influénsia violénsia iha família tanba maioria komunidade laiha kuñesimentu ba lei númeru 7/2010 no lei sira seluk.

GMPTL submete relatóriu kona-ba atividade semináriu kompaña loron 16 (16 dias) ativizmu hapara violénsia hasoru feto no labarik feto iha Munisípiu Manatuto, Postu Administrativu Laclubar no Munisípiu Ermera, Postu Administrativu Atsabe, ne’ebé realiza iha loron 26 novembru 2020 liubá. Atividade kampaña ne’e bazea ba kompromisu GMPTL nian ba Lei númeru 7/2010-Lei Kontra Violénsia Doméstika.

Relasiona ho loron internasionál ba kampaña loron 16 hapara violénsia hasoru feto no labarik feto, GMPTL ealiza semináriu abertura ho tema “Mai Ita Hamutuk Hatete Lae ba Asédiu Seksuál no Violénsia Seksuál” ne’ebé mak ho sub-tema “Favór Hapara Violénsia Hasoru Ami Feto no Labarik Feto! Timor-Leste tenke sai fatin seguru”.

Iha relatóriu GMPTL siita fatór lima ne’ebé influénsia problema iha família mak hanesan fatór sosiál no ekonomia, fatór kultura, fatór poligamia, mídia Sosiál no konsumu álkol.

Fatór Sosiál no Ekonomia: fatór ekonomia mak bainhira la’en simu osan maibé la onestu ba nia feen, bele akontese violénsia iha uma laran, hanesan estraga sasán, lees sertidaun ka dokumentu importante. No fatór sosiál mak bainhira ita kompara ita-nia moris ho ema seluk, hanoin ida hanesan ne’e halo moris la hakmatek iha uma laran nune’e bele provoka violénsia mosu.

Fatór Kultura: fatór ida-ne’e bele hamosu violénsia. Ezemplu iha kultura feto-saan no uma-mane, iha-ne’ebé parte hosi família mane nian tenke fó barlake ba família feto nian. Ida-ne’e dalaruma hamosu violénsia iha uma laran.

Fatór poligamia: mane ne’ebé iha feen liuhosi ida, no laiha kapasidade atu sustenta nia família ho maneira ne’ebé proporsionál ka hanesan.

Mídia Sosiál: bainhira utiliza sala mídia sosiál, ezemplu ko’alia no iha relasaun íntimu ho ema deskoñesidu hosi facebook no WhatsApp.

Konsumu álkol: dala-barak mane ba servisu maibé fila uma ho kondisaun lanu nune’e bele hamosu problema iha uma laran.

Relatóriu GMPTL fó-sai katak, kazu violénsia iha Timor-Leste hahú hosi 2012 to’o loron 25 fulan-novembru 2020 rejista hamutuk 1123. Iha tinan 2019, Munisípiu Manatuto rejista violénsia doméstika hamutuk 32 no violénsia ho asédiu seksuál hamutuk 10. Hosi númeru violasaun ne’e kauza hosi uza mídia sosiál.

“Rekomenda ba Parlamentu Nasionál no Ministériu Justisa, atu halo sosializasaun kona-ba kódigu penál, kódigu sivíl no lei kontra violénsia doméstika, ne’ebé mak dala-barak feto no labarik feto sira sai vítima. Persentajen ne’ebé aas identifika iha área rurál tanba komunidade sira-nia koñesimentu ne’ebé menus ba lei no tipu violénsia sira,” Sekretária GMPTL, Deputada Elvina Sousa Carvalho, ne’ebé akompaña hosi Prezidente GMPTL, Deputada Lídia Norberta dos Santos Martins, aprezenta relatóriu ba plenária, segunda ne’e.

Iha relatóriu ne’e mós rekomenda membru GMPTL sira ne’ebé hola-parte iha komisaun espesializada sira ne’ebé trata asuntu edukasaun, atu haree kestaun sanitária no saneamentu kona-ba hariis-fatin iha eskola públiku sira.

GMPTL mós husu kria lei hodi asegura testemuña ba membru Konsellu Polisiamentu Komunitária (KPK), komunidade no autoridade lokál ne’ebé nu’udar matadalan prinsipál ba kazu violénsia.

GMPTL kontinua husu reforsa direitu ba ema ho defisiénsia atu nune’e bele ratifika konvensaun internasionál tanba iha ona rezolusaun númeru 21/2019.

Ikus liu, GMPTL husu atu ministériu kompetente tau matan ba Uma Mahon Laklubar, liuliu relasiona ho servisu manutensaun ne’ebé durante ne’e hetan apoia hosi Ministériu Solidariedade Sosiál, maibé apoia ne’e la sufisiente hodi kobre nesesidade ba funsionamentu uma mahon refere.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here