Xefe Departamentu Kontrola Moras Hada’et, Marta Abenia Santos entrega xave karreta ba Diretora Laboratóriu Nasionál Saúde, Endang Soares. Imajen Tatoli/Felicidade Ximenes.

DILI, 22 fevereiru 2021 (TATOLI)—Fundu Globál oferese karreta-rua ba Laboratóriu Nasionál Saúde (LABNAS) atu fasilita ekipa Ministériu Saúde (MS) hodi transporta amostra COVID-19 iha Munisípiu Bobonaro no Covalima.

Apoiu ne’e Fundu Globál oferese liuhosi Ministériu Saúde ho totál orsamentu rihun $200-resin atu bele hola mós reazente-sira no mákina GeneXpert módulu 16 nune’e halo diagnóstika lalais ba amostra-sira ne’ebé haruka-mai iha Laboratóriu.

“Ita entrega ona ba LABNAS atu bele fasilita serbisu no nesesidade ne’ebé iha. Karreta-rua ne’e sei uza mós atu transporta amostra hotu-hotu ba kualkér moras iha territóriu tomak iha futuru,” Administradór Divizaun Fundu Globál Ministériu Saúde, Noé Gaspar Pinto da Silva hateten ba jornalista-sira iha Bidau, segunda ne’e.

Noé Gaspar esplika, iha tinan 2018 to’o 2020 Fundu Globál fó apoiu ba programa Tuberculose, Malária no HIV-SIDA iha Ministériu Saúde ho orsamentu  millaun $15-resin.

Bainhira tama iha situasaun COVID-19, nia dehan, Fundu Globál ho Ministériu Saúde halo alterasaun ba utilizasaun orsamentu ne’e hodi aloka hikas orsamentu balun ba programa prevensaun COVID-19, hanesan oras ne’e daudaun hasai hikas rihun $200 hodi sosa karreta no fasilidade laboratóriu-nian ne’ebé mensiona.

Iha fatin hanesan Diretora Laboratóriu Nasionál Saúde, Endang Soares agradese tanba bele hetan apoiu hosi Fundu Globál atu bele fasilita transportasaun amostra-sira ne’ebé iha hela munisípiu. 

“Karreta sira ne’e aban-bainrua bainhira COVID-19 laiha ona ita sei uza nafatin iha laboratóriu hodi tula amostra-sira hosi moras seluk iha munisípiu mai halo teste iha nasionál,’’ nia subliña.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here