Falsifika dokumentu sai veteranu, na’in-sia tama prizaun

DILI, 22 fevereiru 2021 (TATOLI)—Prezidente Konsellu Veteranu, Vidal de Jesus “Riak Leman”, informa ema sira-ne’ebé durante ne’e falsifika dokumentu sai veteranu, daudaun ne’e ema na’in-sia (9) tama ona prizaun.

Notísia Relevante:  PPN apoia AIRDV lori ema falsifika dadus veteranu ba Tribunál

“Progresu kona-ba falsifikasuan dokumentu atu sai veteranu ne’e prosesu la’o hela. Hosi ema na’in-500 ne’ebé falsifika dokumentu sai veteranu ne’ebé sira-nia kazu iha hela Ministériu Públiku, balun agora iha Polísia Sientífika ba Investigasaun Kriminál Timor-Leste (PCIC, sigla portugés), daudaun ne’e ema na’in-sia (9) mak tama ona prizaun,” Vidal de Jesus “Riak Leman”, infroma ba Agência TATOLI iha nia knaar fatin, Obrigado Barack, Matadouro, Dili, segunda ne’e.

Nia hatutan, durante ne’e ema ne’ebé falsifika dokumentu atu sai veteranu la’ós ema na’in-500 de’it maibé ema hamutuk rihun tolu (3000).

“Ha’u ko’alia ona ho ministériu inspetória nian katak ema 3000 hanesan ne’e mak falsifika dokumentu atu sai veteranu. Daudaun ne’e, ami koordena hela atu tun ba Konsellu Munisipál sira, ida-ne’ebé bainhira hetan ona keixa, mai ona Ministériu Públiku no ekipa sira-ne’e sei tun ba haree. Maibé, problema mak orsamentu, entaun ami seidauk bele tun,” nia hateten.

Nia afirma, daudaun ne’e mós parte Konsellu Veteranu nian, sei buka tuir tan ema balun ne’ebé falsifika ona dokumentu atu sai veteranu.

Tanba, nia dehan, sira falsifika dokumentu ne’e la bazea ba situasaun ne’ebé akontese maibé inventa mak barak, entaun agora parte Konsellu Veteranu sei buka tuir tan balun ne’ebé seidauk kaer ne’e.

“Ami mós koordena hela ho ministériu inspetória sira-ne’ebé halo inspensaun no espresaun ba dadus sira-ne’e, sei koordena ho konsellu munispál sira no nasionál atu haree kazu ne’e. Agora tenke la’o tuir leí,” nia dehan.

Nia hatutan, sira-ne’ebé daudaun ne’e lista tama Ministériu Públiku automatikamente osan la simu ona no hein reklamasaun sira reklama mak iha ministériu aprova dehan nia veteranu duni mak nia simu osan. Maibé prova ba mak falsifika dokumentu, pasensia, iha nafatin Ministériu Públiku, hodi prosesa tuir lei no tama prizaun.

Nia esplika, fallansu mosu falsifika dokumentu atu sai veteranu ne’e hosi sira-na’in duni liuliu sira-ne’ebé duadaun ne’e sira-nia kazu tama ona ba Ministériu Públiku.

Tanba, tuir nia, bainhira komisaun tun ba entrevista husu sira mak sira dehan kona-ba prosesu funu nian bosok tun sa’e de’it, entaun to’o ikus halo verifikasaun dadus deskobre katak sira la’ós veteranu.

“Kona-ba klandestina ne’e, loloos ne’e, ami sira-ne’ebé iha ai-laran ida-ne’ebé liga ho ami ne’e ami kuñese. Maibé ida laiha ne’e, estrutura klandestina mak kuñese. Ne’ebé, sasán sira-ne’e mosu tanba inventadu no ikus mai balun tama ona kadeia,” nia hateten.

Prezidente Konsellu Veteranu ne’e dehan, uluk funu la promete ba malu dehan funu hotu simu osan maibé uluk ne’e hanoin ida de’it mak oinsá Timor-Leste hetan ninia indepedénsia. Maibé, funu hotu tiha, Estadu mak hakarak rekuñese ho osan ruma entaun maluk sira-ne’ebé la funu mós funu hotu ona.

“Ita aprezenta durante iha entrevista nia laran ne’e, tuir loloos ne’e di’akliu ita deklara katak ha’u halo funu ne’e partisipa tinan ida no liga ho komadante sé ne’e dehan loloos de’it, labele bosok tun-sa’e. Tanba de’it osan lahalo funu mós halo funu ona. Ida-ne’e labele tanba buat ida funu iha ruin no raan nia leten ne’e, ita ko’alia lia-loos ho loloos,” nia dehan.

Tanba ne’e, nia apela ba públiku hotu katak di’akliu mak lalika falsifika dokumentu atu sai veteranu tanba foufoun ema la hatene maibé ikus mak ema hatene ne’e, osan ne’ebé simu ona tenke depozita fali ba kofre Estadu no ba hatán iha tribunál.

Notísia Relevante: MACLN identifika tan dokumentu veteranu falsu 3000-resin

MP halo hela investigasaun ba dokumentu veteranu “falsu” 500-resin

Jornalista: Arminda Fonseca

Editór: Cancio Ximenes