Prezidente AMVTL, Antoninho do Carmo. Imajen Tatoli/Felicidade Ximenes.

DILI, 22 Fevereiru 2021 (TATOLI)—Estrutura Asosiasaun Médiku Veterináriu Timor-Leste (AMVTL) ba periúdu 2021 to’o 2023 ne’ebé eleitu liu hosi Asembleia Jerál daruak iha otél Luz Clarita, sei tau prioridade ba área prinsipál-tolu durante mandatu.

Prezidente AMVTL eleitu, Antoninho do Carmo temi katak área prioridade-tolu ne’e primeiru sei hadi’a parte interna asosiasaun-nian hodi hasa’e kompeténsia médiku veterináriu-sira tanba durante ne’e ema ladún koñese no animal barak mak hetan tratamentu la di’ak.

Segundu, sei serbisu hamutuk ho universidade-sira atu haree fila-fali kurríkulu animál-nian inklui kolabora ho organizasaun internasionál no lokál-sira tanba realidade hatudu katak, estudante barak hili área veterinária maibé seidauk hatene atu halo saida iha futuru.

Terseiru, sei halo divulgasaun informasaun barak ba komunidade kona-bá papél médiku veterináriu hamutuk ho parseiru prinsipál Ministériu Agrikultura no Peskas (MAP) oinsá polítika lori saúde animál besik liu-bá komunidade.

“Ita sei halo sosializasaun ba komunidade kona-bá papél hosi médiku veterináriu no mós sei konsiensializa ema atu halo tratamentu ba animál ho di’ak,”  Antoninho do Carmo hateten ba jornalista-sira hafoin realiza Asembleia daruak, segunda ne’e.

Oras ne’e daudaun médiku veterináriu iha na’in 16 ne’ebé sai hanesan membru prinsipál iha asosiasaun ne’e.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here