Diretora Serbisu Munisípal Edukasaun Juventude no Desportu Aileu, Cristina da Conceição. Imagén TATOLI/Antónia Gusmão.

DILI, 22 fevereiru 2021 (TATOLI)—Ensinu Pré-Eskolár (EPE) hamutuk 20 ne’ebé Plan Internasionál estabelese iha Munisípiu Aileu to’o oras ne’e seidauk hetan Merenda Eskolár no Konsensaun Eskolár (MEKE) hosi Ministériu Edukasaun Joventude no Desportu (MEJD).

“Eskola 20 ne’e seidauk hetan Merenda Eskolár no Konsensaun Eskolár tanba sira seidauk tama iha rede públiku no orsamentu ne’ebé prevee ba programa rua ne’e Governu la sita. Tanba ne’e Governu seidauk fó atensaun hodi apoia eskola hirak-ne’e,” Diretora Serbisu Edukasaun Munisípiu Aileu (DSEMA), Cristina da Conceição hateten ba jornalista Agencia Tatoli via telefónika, segunda ne’e.

Notísia Relevante:MAE prevee millaun $15 ba Merenda Eskolár

Kona-bá ne’e nia parte koordena ona ho Administradór Munisípiu Aileu atu buka solusaun hodi tau iha planu tinan 2022 ba asesu Merenda Eskolár no Konsensaun Eskolár-nian.

Cristina da Conceição esplika, Plan Internasionál estabelese eskola hirak-ne’e ho prosesu aprendizazen utiliza de’it edifísiu Eskola Bázika Filiál-sira no oras ne’e atividade eskolár la’o normál.

“Situasaun ne’e ezije ita atu buka soluasaun no Governu presija fó apoiu tanba seidauk iha fatin ne’ebé adekuadu ba prosesu aprendizazen,” nia subliña.

Hosi EPE 20 ne’e, iha 12 mak ninia-prosesu aprendizazen responsabiliza direta hosi komunidade no 8 sei iha responsabilidade Plan Internasionál-nian.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here