Idózus sira hosi Postu Fatumea, Covalima, hamriik formatura hodi partisipa hasai mostra screening swab COVID-19. Imajen Tatoli/Eugénio Pereira

COVALIMA, 22 fevereiru 2021 (TATOLI)- Tama ba loron hitu, konta hosi loron  16 to’o loron 22 fevereiru ne’e, ekipa vijilánsia Ministériu Saúde rekolla ona amostra screening swab COVID-19 iha liña fronteira Munisípiu Covalima ba abitante na’in- 1.178.

Medikál Sientista, António Sales, informa númeru ne’e sa’e maka’as liu tiha alvu ne’ebé Governu termina ba  700 tanba autoridade no povu Covalima iha liña fronteira entuziazmu hakarak kontribui hasai amostra hodi ajuda Governu luta kontra COVID-19 iha Timor-Leste.

Notísia Relevante : Governu agradese partisipasaun povu iha teste swab COVID-19

António Sale ba jornalista iha Postu Administrativu, Fatululik, Munisípiu Covalima, segunda ne’e, informa amostra hirak ne’e transporta ona ba nasionál, enkuantu amostra hosi teste screening  ba iha Postu Administrativu Fatululik nian ba ohin loron ho númeru 90  no ekipa vijilánsia sei konserva hela iha Suai vila hodi hein ekipa transporta ba Laboratóriu Nasionál, Dili.

António Sales husu ba autoridade suku no populasaun sira kontinua kumpre regra protokolu hosi Organizasaun Mundiál Saúde  (OMS) no Ministériu Saúde kona-ba fase-liman beibeik, uza máskara no mantein distansiamentu sosiál hodi bele  prevene aan  hosi COVID-19.

Tuir ajenda, tersa (23/02), ekipa sei kontinua rekolla amostra iha Postu Administrativu Maucatar no Suku Fatululik nian.

Observasaun Agência TATOLI nota, ekipa vijilánsia Ministériu Saúde durante rekolla amostra hetan seguransa másimu hosi membru FALINTIL-Forsa Defeza Timor-Leste no Polísia Nasionál Timor-Leste (PNTL) no akompaña hosi autoridade lokál sira.

Rezultadu negativu 718

Vise Koordenadora Forsa Tarefa Prevensaun no Metigasaun COVID-19, Odete da Silva Viegas dehan, prosesu foti amostra iha Munisípiu Covalima, Bobonaro no Oe-Cusse rezultadu teste iha laboratóriu 718 negativu no númeru 276 sei kontinua halo hela analiza.

“Hakarak informa katak, ekipa koleta amostra hamutuk 1.356 hosi totál ne’e amostra 994 maka lori ona mai laboratóriu nasionál no rezultadu negativu 718 no sei hein   rezultadu hamutuk 276 no iha munisípiu tolu ne’e mós ekipa sei kontinua rekolla amostra,” nia hateten.

Tuir dadus ne’ebé Ministériu Saúde rekolla prosesu foti amostra iha Munisípiu Bobonaro to’o ona 80%, iha Covalima 73% no iha Oe-Cusse 34%.

Antes ne’e Ministra Saúde, Odete Maria Freitas Belo dehan, tempu ikus ba ekipa sira aprezenta relatóriu foti amostra iha Munisīpiu Covalima, Bobonaro no Oe-Cusse sei termina iha loron 25 fevereiru, hodi aprezenta ba Governu.

 Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here