Agrikultór ida tau-matan hela ba to’os iha Atabae. Imajen Tatoli/António Gonçalves

DILI, 22 fevereiru 2021 (TATOLI)—Alumni Parlamentár Foinsa’e Timor-Leste (APFTL) no Oxfam sei realiza espozisaun kona-ba juventude iha agrikultura ho tema “Joven Ba Mudansa” ne’ebé sei realiza Munisípiu Ermera iha loron 04 fulan marsu tinan 2021.

Espozisaun ne’e realiza, atu inspira joven sira hodi partisipa ativa iha setór agrikultura, ne’ebé nu’udar dalan ba diversifikasaun ekonómia iha Timor-Leste.

Reprezentante Oxfam, Adilson da Costa Júnior, hateten razaun realiza atividade espozisaun ne’e atu hatudu ba joven iha munisípiu sira katak servisu agrikultura nu’udar setór importante, tanba ne’e presiza tebes joven sira-nia partisipasaun atu bele dezenvolve no haburas liután setór agrikultura ho setór produtivu sira seluk.

“Ho nune’e hamenus depedénsia ba Fundu Petrolíferu. Tanba partisipasaun joven iha agrikultura bele influénsia Governu nia polítika atu fó importánsia ba papél juventude nian hodi hadi’ak ekonómia rai laran,” Adilson da Costa Júnior hatete ba jornalista sira, iha salaun Oxfam, Aimutin, Dili, segunda ne’e.

Nia hatutan, Oxfam konsidera katak joven sira-nia dedikasaun, kreatividade, investimentu no partisipasaun iha setór agrikultura sei haburas di’ak liután ekonómia família no ekonómia nasaun nian.

Bainhira Governu kontinua apoiu no fó espasu ba joven sira atu promove sira-nia kreatividade no produtu sira signifika Estadu sei valoriza no rekuñese sira-nia servisu.

Entretantu, Prezidente APFTL, Zaulino Gomes da silva konsidera katak setór agrikultura nu’udar setór ida-ne’ebé importante mós hodi bele kontribui ba hadi’ak ekonómia família no nasaun nian, tan ne’e konsidera mós iha Planu Estratéjia no Planu Asaun Anual Organizasaun nian kada tinan hodi fornese espasu ba joven sira bele espresa sira-nia talentu no kreatividade iha públiku.

“Objetivu hosi espozisaun ne’e mak joven ativu, saudável, produtivu, kompetetivu no sai autór ba mudansa. Tanba partisipante sira ne’ebé sei partisipa maihosi grupu juventude hortikultura, pekuária, agrikultura, turizmu no ambiente,” nia dehan.

Kona-ba osan, nia dehan, bazea ba proposta APFTL nian ba Oxfam, hamutuk rihun $6 maibé ne’e ba Munisípiu Ermera de’it.

Tuir submisaun hosi Oxfam ba Parlamentu Nasionál iha Proposta OJE 2021 mós sujere atu investe makaas iha setór produtivu sira, ho nune’e bele hasa’e númeru joven sira iha servisu agrikultura hodi kontribui ba diversifikasaun ekonomia.

Relatóriu avaliasaun agrikultura nian ne’ebé Oxfam prodús no deskobre katak joven sira ladún iha interese iha servisu agrikultura nian no sira-nia inan-aman ativamente enkoraja sira atu buka servisu di’ak, tanba servisu agrikultura ne’e “fo’er demais” no “servisu todan”.

Estabelese agrikultura família nian mak asaun ida dis-insentiva: la hanesan ho sira ne’ebé buka servisu simu osan nian, susar tebes ba joven agrikultór atu sai independente hosi sira-nia inan-aman.

Bazea ba konstituisaun RDTL ne’ebe define kona-ba obrigasaun Governu ba juventude, artigu 19 husi konstituisaun RDTL versikulu-1, hatete katak Estadu foti no fó barni ba joven feto no mane, atu sira bele hako’ak metin unidade nasionál, bele harii fali, tuba no haburas nasaun ne’e.

Versikulu-2, Estadu sei halo buat hotu-hotu ne’ebé nia bele atu tulun edukasaun, saúde, formasaun profisionál ba joven sira. Rezultadu sensu 2015 hatudu maiória populasaun Timor-Leste mak joven ho tinan 15-24, sira ne’e sai parte hosi sosiedade ne’ebé iha papél siginifikante iha nasaun ida-ne’e.

Nune’e mós define iha polítika nasionál Juventude nian, kuaze 21% hosi númeru totál populasaun 1,167,242 mak joven, tuir sensu tinan 2015. Númeru ida-ne’e signifikante tebes, nu’udar nasaun ho maiória populasaun mak ho idade joven, ne’e sai poténsia  ida-ne’ebé ba dezenvolvimentu nasaun.

Timor-Leste ninia populasaun ne’ebé maizumenus 80% moris ho vida agrikultura subsistensia, to’o oras ne’e seidauk dezenvolve ho di’ak. Alende ne’e, partisipasaun joven sira iha setór agrikultura sai modelu ida ne’ebé bele kontribui di’ak liután ba dezenvolvimentu setór ida-ne’e.

Jornalista: Osória Marques

Editór: Cancio Ximenes

1 KOMENTÁRIU

  1. Agricultor Mak Fuan ou Centro ba Dezenvolvimento,Tamba iha hahan Mak bele serbisu,selae iha Agricultor atu Produs aihan,Ita Ema SAE Lae iha Energia atu sebisu,maibe iha MOS Nia Parseiro Mak Saude,Tamba atu Produs hahan MOS Ita Ema tenki Ho Kondisaun Saude Diak atu bele halao actividades nune MOS hahan nebe Ita ckonsumo MOS tenki
    Higiene,ou MOS Lae afeita Virus ou Ho Condisionavel Diak.

HAKEREK NO HATÁN

Please enter your comment!
Please enter your name here