Aktividade traballadór sira ne’ebé halo servisu konstrusaun ba Ponte Comoro 3 iha área Fomento Comoro, Dili iha loron 17 maiu 2017. Imajen Tatoli/António Gonçalves

DILI, 22 fevereiru 2021 (TATOLI)—Diretór Ezekutivu Asosiasaun Timor-Leste (ADTL), Cesário da Silva, husu ba Governu kria kondisaun no mellora situsaun balun hodi asesgura Ema ho Defisiénsia (EhD) sira-nia partisipasaun iha Dezenvolvimentu Nasionál (DN).

Notísia Relevante: ADTL agradese Governu estabelese rádiu komunidade ba ema ho defisiénsia sira

“Ami nafatin rekomenda ba Governu atu kria kondisaun no mellora situsaun balu hodi asesgura ema ho defisiensia nia partisipasaun dezenvolvimentu nasionál tanba ema hotu iha direitu ne’ebé hanesan,” Cesário da Silva hateten, ba Agência TATOLI relasiona ho komemorasaun Loron Mundiál ba Justisa Sosiál, iha nia knaar fatin, Quintál-Boot, Dili, segunda ne’e.

Tuir sira-nia observasaun durante ne’e, nia dehan, justisa sosiál ne’e rasik haree partisipasaun maluk defisiénsia nian ba dezenvolvimentu nasionál ne’e menus liu.

Maibé, nia agradese ba Governu tanba daudaun ne’e apoiu ADTL hodi hahú daudaun ona halo introdusaun polítika nasionál promosaun no protesaun ba Ema ho Defisiénsia sira. Iha liña ministériu sira, hahú diskute kona-ba oinsá integra asuntu defisiénia nian iha sira-nia planu no programa polítika.

“Polítika ida-ne’e ami konsidera apoiu ona ba asuntu ema ho defisiénsia nian,” nia dehan.

Nia hateten, daudaun ne’e mós rezolusaun Ministériu Obras Públika nian (MOP) kona-ba asegura asesibilidade fíziku iha konstrusaun públiku hotu-hotu, atu asegura asesibildade atu ema ho defisiente bele hola parte. Entaun, ida-ne’e polítiku Governu nian ne’ebé hatudu komitmentu boot ba asuntu defisiénsia.

Aliende ida ne’e, nia dehan, la’ós MOP mak asegura asesibilidade fíziku iha konstrusaun públiku maibé iha Ministériu seluk mós hanesan Ministériu Solidaridade Sosiál no Inkuzaun (MSSI) hahú ona atu apoiu subsídiu ba ema ho defisiénsia no apoiu intensionál mós ba ema ne’ebé tau matan ba defisíensia.

Nune’e mós, iha Ministériu sira seluk hanesan Sekretáriu Estadu Formasaun Profesionál no Empregu (SEFOPE) nian hahú integra sira-nia programa The Job Training no Sekretáriu Estadu Juventude no Desportu (SEJD) apoiu movimentu ema ho defisiénsia iha sentru desportu no mós apoiu ADTL ba atividade joven ho defisiénsia sira-nian.

Entretantu, nia informa, durante ADTL rejistu membru parseiru sira ne’ebé servisu direta ba ema ho defisiénsia ne’e hamutuk organizasaun 22 no organizaaun 22 ne’e hala’o atividade ne’ebé mak espesífiku ba asuntu defisiente iha Timor-Leste.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here