oven-sira tesi ai ne’ebé mota sobu iha suku Dato. Imajen/Laurindo de Jesus dos Santos.

DILI, 21 fevereiru 2021 (TATOLI)—Komunidade suku Dato, Postu Administrativu Liquiçá-vila, munisípiu Liquiçá ameasadu hosi mota Laklolema ne’ebé hela de’it metru sanulu atu sobu sira-nia hela fatin.

Komunidade Antoninho Alves Correia informa, udan boot durante semana tomak mota tuun makaas no hakatliu barrajen ne’ebé konstrui ona.

“Bainhira udan kontinua hanesan ne’e sei estraga ami-nia uma. Kuandu udan iha tempu kalan ami la toba tanba tenke prepara atu salva aan,” Antoninho Alves Correia informa ba jornalista Agência Tatoli via telefónika, domingu ne’e.

Alende ne’e Prezidente Joventude Munisípiu Liquiçá, Laurindo de Jesus dos Santos ne’ebé hala’o observasaun direta ba mota ne’e kontaktu kedan ba jornalista Agência Tatoli hodi  informa kona-bá situasaun atuál tanba oras ne’e udan kontinua boot.

Xefe Joventude ne’e mós organiza kedan joven-sira hodi halo vizilánsia iha fatin ne’e atu salva komunidade hosi ameasa mota-nian.

“Ami kontinua halo vizilánsia atu salva komunidade bainhira iha situasaun perigu tanba udan la para,” nia hateten.

Nia mós temi edifísiu públiku ne’ebé hetan ameasa boot hosi mota mak hanesan edifísiu óleu pezadu, edifísiu Universidade da Paz (UNPAZ), uma komunidade rihun-ida-resin, eskola primária Mauboque no estrada públiku ne’ebé liga direta Liquiçá ho Bobonaro.

Antes ne’e Laurindo haruka ona karta ba Institutu Jestaun Ekipamentu (IJE) atu oferese ekipamentu pezadu hodi suru rai-henek ne’ebé oras ne’e taka tomak barrajen, maibé seidauk iha resposta.

“Ami husu nafatin ba Ministériu Obra Públika atu konsidera ami-nia pedidu ne’e tanba di’ak liu ita prevene no lalika hein komunidade hetan ona dezastre mak mosu-mai  ne’e tarde ona,” nia fó hanoin.

Laurindo ezije ne’e tanba prosesu aprendizazen iha eskola primária Mauboque la’o hela maibé bainhira iha tempu udan tenke paradu tanba profesór no estudante-sira trauma ho korrente mota-nian.

Jornalista: Evaristo Soares Martins

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here