Estudante-sira halo simulasaun ba matéria ne'ebé oferese hosi BCTL kona-bá peskiza karaterístika ekonómika no inkluzaun finanseira, iha igreja antigu Letefoho, Sábadu (20/02). Imajen Tatoli/Antónia Gusmão.

ERMERA, 20 fevereiru 2021 (TATOLI)—Eskola Ensinu Sekundáriu Jerál (ESJ) Katólika Nossa Senhora do Carmo (NOSCAR) Letefoho, Munisípiu Ermera kumpri medida prevensaun COVID-19 hanesan uza máskra, distansiamentu sosiál no fase liman beibeik ho sabaun.

Diretór eskola, Padre Hélio Perreira Fernandes hateten lia hirak ne’e ba jornalista Agência Tatoli iha Letefoho, sábadu (20/02).

Notísia Relevante:Enumeradór-sira prontu implementa rezultadu formasaun hosi BCTL

“Desde deklarasaun Estadu Emerjénsia iha fulan marsu 2020, ami mós kumpri hodi haruka estudante-sira férias atu hein sirkulár hosi Ministériu Edukasaun, Juventude no Desportu kona-bá regra-sira. Ami kumpri rekezitu sira-ne’e,” Padre Hélio hateten.

Buat ne’ebé eskola prepara atu fasilita estudante sira iha prosesu aprendizazen perante situasaun COVID-19 mak hanesan bee-moos, hand sanitizer no profesór-sira inklui dirijente eskola-nian tuir teste ba prevensaun ne’ebé realiza hosi MEJD koopera ho Ministériu Saúde (MS).

Rezultadu teste ne’e di’ak, nune’e MEJD liuhosi departamentu edukasaun munisipál nian halo verifikasaun no haree katak eskola ne’e iha kondisaun duni atu re-ativa prosesu aprendizazen.

“Estudante sira sempre uza máskara antes tama sala-de-aula, tenke fase liman ho sabaun no mantein distansiamentu sosiál iha aula laran,” Diretór eskola ne’e subliña.

Difikuldade maka, iha tempu udan dala-ruma máskra ne’ebé estudante sira uza tenke bokon no tenke uza fila-fila tanba limitadu.

“Eskola rasik prepara no bainhira estudante sira presija tenke hola. Osan ne’e entrega direta ba tezoreira eskola-nian mak halo jestaun,” Padre Hélio hateten.

Difikuldade seluk maka, durante implementasaun EE estudante balun la marka prezensa ho másimu tanba tauk, maibé situasaun ne’e la fó impaktu boot ba prosesu aprendizazen.

Kona-bá fasilidade, diretór ne’e dehan eskola presija liu mak livru siénsia naturál no sosiál tanba to’o oras ne’e livru iha biblioteka menus-liu.

Totál alunu ne’ebé oras ne’e estuda iha eskola ne’e hamutuk 327 ho profesór ne’ebé hanorin sufisiente.

Jornalista: Antónia Gusmão

Editór: Cipriano Colo

HAKEREK NO HATÁN

Please enter your comment!
Please enter your name here