Administradór Postu Administrativu Letefoho, Julião Marito de Deus. Imajen Tatoli/Cipriano Colo.

ERMERA, 21 fevereiru 2021 (TATOLI)—Ekipa konjunta iha Postu Administrativu Letefoho, Munisípiu Ermera kontinua halo kampaña hodi konsiensializa komunidade atu halo prevensaun ba moras COVID-19 no dengue.

“Desde inísiu deklarasaun Estadu Emerjénsia, iha nível postu halo kedan sensibilizasaun to’o aldeia. Ami sempre halo koordenasaun di’ak ho autoridade hotu-hotu ba implementasaun programa konjunta ne’e,” Administradór Postu Administrativu Letefoho, Julião Marito de Deus hateten ba jornalista Agência Tatoli iha Letefoho, sábadu (20/02).

Notísia Relevante:Janeiru-favereiru, MS rejista kazu dengue 337 no ida mate

Autoridade másima postu administrativu ne’e husu populasaun atu informa lalais ba parte kompetente bainhira hatene ema ruma tama hosi rai-liur.

Programa sensibilizasaun ne’ebé durante ne’e hala’o iha Letefoho ko’alia mós kona-bá moras dengue tanba dadus hosi Ministériu Saúde hatudu katak munisípiu Ermera tama iha kategoria ho númeru aas.

“Iha dadus ne’ebé fó sai hosi Ministériu Saúde, Ermera mós rejista kazu dengue aas. Tanba ne’e ami sensibiliza mós komunidade oinsá prevene-aan hosi moras ne’e,” Julião akresenta.

Ekipa konjunta ne’e kompostu hosi autoridade postu administrativu, ekipa saúde, edukasaun no seguransa.

Dadus fulan janeiru to’o fevereiru hosi Diresaun Nasionál Kontrolu Moras, Ministériu Saúde hatudu katak kazu dengue aas liu mak munisípiu Dili hamutuk ema na’in 204, Baucau na’in 56, Bobonaro 23 no Ermera 13.

Alende ne’e dadus COVID-19 ba loron 20 fevereiru 2021, komulativu teste hamutuk 20.694, komulativu negativu 20.549, hein rezultadu 42, komulativu kazu 103, kazu foun laiha, rekopera ida, komulativu rekoperadu 82+4 = 86.

Pasiente sira-ne’ebé atuál baixa iha sala izolamentu Vera Cruz 21, kuarentena 258, Dili 191, munisípiu 67, auto-kuarentena 7, Dili 6, munisípiu ida, pasa ona loron 14 hamutuk 8.005, Dili  6.575, munisípiu 1.430. 

Notísia Relevante:Governu re-integra pasiente COVID-19 rekoperadu na’in-ida ba familia

Jornalista: Antónia Gusmão

Editór: Cipriano Colo

HAKEREK NO HATÁN

Please enter your comment!
Please enter your name here