Kondisaun atuál estrada ligasaun Postu Administrativu Letefoho-Vila ba suku Dukurai. Imajen/Richard Carlito de Deus.

ERMERA, 21 fevereiru 2021 (TATOLI)—Autoridade Postu Administrativu Letefoho, Munisípiu Ermera kontinua hein apoiu hosi Institutu Jestaun Ekipamentu (IGE sígla portugés), atu ateru estrada públiku ligasaun Gleno-Letefoho to’o suku ne’ebé difikulta movimentu transporte iha tempu udan.

Administradór Postu Administrativu Letefoho, Julião Marito de Deus hateten iha loron 8 janeiru 2021 haruka ona proposta ba IGE ho konteúdu asuntu urjente hodi apoia ekipamentu pezadu ne’ebé bele ateru estrada aat.

Nia dehan, pedidu ne’e hetan resposta pozitivu hosi dirijente IGE no halo ona verifikasaun iha terrenu iha loron 12 janeiru maibé to’o oras ne’e seidauk ezekuta.

“Kondisaun estrada hosi Gleno–Letefoho hetan estragus makaas hosi udan-been no ita hein-hela IGE atu halo ateru. Ha’u kontaktu ona no oras ne’e sira sei kee hela dalan hosi suku Legimea bainhira remata sei kontinua kedan ba Letefoho,” Julião Marito de Deus hateten ba jornalista Agência Tatoli iha Letefoho, sábadu (20/02).

Fatin sira ne’ebé mensiona iha pedidu ne’e hahú kedan hosi ponte Kaibiti to’o Letefoho-vila no kontinua to’o iha suku Dukurai kuaze kilómetru tolu.

Julião Marito de Deus informa katak, autoridade lokál sira mós ezije beibeik ba administradór hodi buka solusaun ba kestaun ne’e tanba populasaun labele transporta produtu lokál ba merkadu.

Administradór ne’e apela ba komunidade iha suku ualu ho aldeia 67 ne’ebé  pertense ba Postu Administrativu ne’e atu koopera ho autoridade nune’e fasilita ekipa IGE ne’ebé sei halo ateru ba estrada no evita labele mosu dezintendimentu.

Dalan Letefoho hanesan dalan públiku ne’ebé liga direta movimentu entre munisípiu Bobonaro, Ainaro no Covalima.

Jornalista: Antónia Gusmão

Editór: Cipriano Colo

HAKEREK NO HATÁN

Please enter your comment!
Please enter your name here