DILI, 21 fevereiru 2021 (TATOLI)—Aban, reprezentante povu iha Parlamentu Nasionál (PN) sei debate proposta-lei saúde iha faze jeneralidade kona-bá vizilánsia sanitária no vizilánsia epidemiolójika.
Ajenda ne’ebé Agência Tatoli asesu hateten, aban diskusaun no votasaun iha faze jeneralidade ba proposta-lei númeru 20/V(2a)-primeira alterasaun ba lei númeru 10/2004, 24 novembru kona-bá Lei sistema saúde.
Notísia Relevante:Komisaun F halo audiénsia ho MS kona-ba proposta-lei sistema saúde
Proposta-lei ne’e rasik Ministériu Saúde submete ba Parlamentu Nasionál iha fulan-jullu 2020 no iha loron 4 fevereiru 2021, Komisaun F ne’ebé trata asuntu saúde iha Parlamentu Nasionál (PN) halo ona audiénsia ho ekipa Ministériu Saúde kona-bá proposta-lei ne’e.
“Iha proposta-lei ne’e ami halo diskusaun kona-bá vizilánsia sanitária no vizilánsia epidemiolójika,” Ministra Saúde, Odete Maria Freitas Belo esplika bainhira halo audiénsia ho Komisaun F.
Ministra Saúde hatutan, proposta-lei ne’e iha mós artigu ne’ebé ko’alia kona-bá vasina no imunizasaun.
“Iha vizilánsia sanitária ne’e ita haree liu kona-bá prevensaun. Kona-bá dezeinfekta sasán, fase-liman tama iha autoridade vizilánsia no vizilánsia epidemiolójiku haree liu kona-bá kazu sira,” Odete fundamenta.
Iha parte seluk, aban, Parlamentu Nasionál sei hala’o votasaun finál globál ba proposta-lei númeru 11/V(2a) kona-bá rejime jurídiku ba arbitrájen voluntária no prosede primeira alterasaun Kódigu Prosesu Sivíl (CPC-sigla portugés).
Notísia Relevante:Ohin, PN aprova proposta-lei arbitrajen voluntária iha finál globál
Jornalista: Evaristo Soares Martins
Editór: Cipriano Colo
