Ilustrasaun vasina COVID-19. Imajen/Espesiál

DILI, 20 fevereiru 2021 (TATOLI)—Ministériu Saúde (MS) esplika kona-bá vasinansaun COVID-19 ne’ebé ekipa sei halo ba populasaun iha tempu badak ho objetivu atu ema-nia sistema imunidade forte hodi proteje aan hosi moras todan.

Xefe Departamentu Promosaun Edukasaun Saúde, Misliza Vitál garante katak susbstánsia hosi vasina ne’e sei halo ema-nia imunidade seguru tanba péritu-sira halo ona estudu ne’ebé hatudu vasinasaun ne’e iha efeitu boot liu ba protesaun hosi COVID-19 ne’ebé oras ne’e invade mundu.

Notísia Relevante:OMS rekomenda tipu vasina AstraZeneca ba Timor-Leste

“Vasina COVID-19 ne’ebé Timor-Leste atu uza, daudaun ne’e liu ona teste seguru no prienxe padraun mundiál kompara ho vasina sira seluk ne’ebé prodúz ona iha tinan barak,” Misliza Vitál esplika ba jornalista sira iha salaun Ministériu Saúde, Caicoli, sesta ne’e.

Tuir planu, ema ne’ebé sei hetan uluk vasina iha fulan abríl hamutuk 20% kompostu hosi sira ne’ebé serbisu ensensiál iha liña frente hanesan pesoál Saúde, membru FALINTIL Forsa Defeza Timor Leste (F-FDTL), membru Polísia Nasionál Timor Leste (PNTL), pesoál serbisu Eletrisidade Água no Saneamentu, pesoál serbisu iha área fronteira, jornalista, profesór sira,  pesoál restaurante, loja, merkadu,  relijiozu-relijioza,  líder komunitáriu no politiku sira.

Persentazen ida ne’e konta mós ho populasaun ne’ebé sofre moras króniku hanesan tensaun alta, diabetes, moras fuan no seluk tan inklui sira ne’ebé ho idade 60 ba leten.

“Populasaun alvu ne’ebé ho idade 60 ba leten no grupu ne’ebé mensiona atu simu vasina iha primeira etapa mak sira ne’ebé hela iha Rejiaun Administrativa Espesiál Oe-cusse Ambeno (RAEOA), Dili, Covalima no Bobonaro,” Misliza Vitál subliña.

Kona-bá mekanizmu ba vasinasaun, ekipa médiku mak sei destaka ba instituisaun sira ne’ebé grupu alvu-sira haknaar aan bá.

Alende ne’e ba ema sira ne’ebé moras króniku no sira ne’ebé idade 60 ba leten sei simu vasina iha postu saúde ne’ebé besik.

Segunda etapa, ekipa MS sei halo 80% hosi populasaun alvu iha Timor-Leste ne’ebé sei hahú iha fulan setembru 2021, tanba sei define tuir avaliasaun klíniku no fornesimentu vasina iha primeira etapa.

Antes ne’e Organizasaun Mundiál Saúde (OMS) rekomenda ona ba Governu Timor-Leste (TL) atu hili ai-moruk ho tipu AstraZeneca ba Vasinasaun COVID-19.

Rekomendasaun ne’e OMS fó tanba haree no tetu ba buat-tolu mak hanesan haree ba efikásia protesaun, seguransa no sistema iha rai-laran hodi prepara atu simu vasinasaun.

Tuir dadus OMS katak oras ne’e daudaun ema rihun 24-resin mak uza ona vasina AstraZeneca ba faze datoluk iha Brasíl, Reinu Unidu no Áfrika.

Hosi ema ne’ebé tuir iha faze datoluk ne’e, iha de’it ema na’in-tolu mak relata iha efeitu adversu, no iha India ema tokon hitu mak vasina ona ho AstraZeneca maibé seidauk relata ninia efeitu adversu.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here