Produtu Cesta Bázika iha bote Imajen TATOLI/Antónia Gusmão

ERMERA, 20 fevereiru 2021 (TATOLI)—Administradór Postu Administrativu Letefoho, Munisípiu Ermera, Julião Marito de Deus, informa iha Postu Asministrativu Letefoho iha suku ualu (8) ho aldeia hamutuk 67 maibé suku tolu (3) mak simu ona sasán Programa Cesta Bázika nian.

Notísia Relevante: Implementasaun Cesta Bázika atinje ona 62,31%

“Husi suku ualu ne’e, suku tolu maka simu ona cesta bázika. Suku sira mak simu ona sasán cesta bázika nian mak hanesan Suku Era-Ulu, Goulolo no Suku Hatugau. Kaléndariu ba suku sira seluk ne’e mak ha’u rasik seidauk hetan,” Julião Marito de Deus relata ba Agência Tatoli iha Postu Administrativu Letefoho, Munisípiu Ermera, sábadu ne’e.

Autoridade postu administrative ne’e konsidera programa cesta bázika ne’e di’ak tebes tanba benefisia direta ne’ebé simu sasán sira-ne’e mak komunidade sira.

“Hanesan administradór postu administrative nian, ha’u haree programa ne’e di’ak tebes tanba ema hotu iha dereitu ne’ebé hanesan. Katak, ema-ne’ebé hetan osan boot ka ki’ik maibé temi sidadaun entaun hotu-hotu hanesan katak benefisiária hotu ba programa ne’e. Komunidade rasik mós kontente tanba hetan oportunidade hetan sasán sira iha momentu hanesan ne’e. Halo komparasaun ho osan, ida-ne’e di’ak liu,” Julião argumenta.

Nia hatutan, nu’udar autoridade másima Postu Administrativu Letefoho nian seidauk simu relatóriu ruma hosi suku sira katak iha empreza ruma sosa produtu lokál komunidade nian.

Maske nune’e, nia haree katak realidade produtu ne’ebé utiliza iha cesta bázika mai hosi produtu lokál.

“Atu fó hatene katak antes implementa programa ne’e iha Letefoho, ami halo enkontru uluk ho xefe suku sira, hodi informa ba komunidade katak hotu-hotu tenke apoia. Iha lamentasaun ruma karik sei verifika uluk. Sasán ruma la to’o, tenke ko’alia ho empreza fornesedór, la’ós buat ki’ik ida bele lori sai boot. Ida-ne’e mak ami orienta hela ba populasaun sira,” nia hateten.

Aleinde ida-ne’e, nia preokupa makaas tanba udan iha Letefoho kuaze fulan ida-resin ona la para no loro-loron akompaña ho anin boot, nune’e sei afeta ba distribuisaun produtu cesta bázika tanba dalan ba suku sira kondisaun grave tebes.

Notísia Relevante: BCTL realiza formasaun kona-ba peskiza karáteristika ekonómika ba estudante Letefoho

Jornalista: Antónia Gusmão

Editór: Cancio Ximenes 

HAKEREK NO HATÁN

Please enter your comment!
Please enter your name here