Vise-Ministru Saúde, Bonifácio ‘Maucoli’ dos Reis, konsulta hela pasiente durante vizita iha Suku Balibar foin lalais ne’e. Imajen/Felicidade Ximenes.

DILI, 20 fevereiru 2021 (TATOLI)— Ministériu Saúde (MS) iha ona planu ba tinan 2021 atu harii no halo reabilitasaun ba edifísiu postu saúde no rezidénsia ba médiku hamutuk 22 iha munisípiu hotu.

Vise-Ministru Saúde, Bonifácio ‘Maucoli’ dos Reis, esplika projetu sira ne’ebé tama iha planu ne’e atualmente avansa ona hanesan halo rezidénsia ba médiku ho parteira-sira hamutuk pakote 11 no halo edifísiu postu saúde pakote 11 ho totál 22.

Notísia Relevante:Komisaun F husu MS estabelese rezidénsia ba médiku sira

“Projetu sira ne’e ita fahe hanesan ba munisípiu hotu inklui Ermera hetan rua, maibé depende ba nesesidade tuir identifikasaun hosi parte tékniku Ministériu nian,’’ Bonifácio ‘Maucoli’ dos Reis, ba jornalista Agência Tatoli iha Ministériu Finansa Aitarak-laran, sesta ne’e.

Nia subliña postu saúde iha Munisípiu sira, balun halo reabilitasaun no balun halo konstrusaun foun tanba ne’e Governu fazeadamente hahú ezekuta ona no tuir planu iha 2022 sei halo barak liu-tan.

Antes ne’e Komisaun F ne’ebé trata asuntu saúde, seguransa sosiál no igualdade jéneru iha Parlamentu Nasionál (PN) husu Ministériu Saúde atu harii rezidénsia ba médiku iha área rurál.

Pedidu ne’e bazeia ba fiskalizasaun komisaun nian iha Postu Saúde Laisorulai, Postu Administrativu Quelicai, Munisípiu Baucau ne’ebé identifika médiku-sira laiha rezidénsia no obrigadu tenke la’o ho distánsia dook hodi halo atendimentu ba populasaun.

Iha relatóriu Komisaun F mós relata katak, situasaun iha área rurál liuliu postu saúde sira maioria sei difísil ba asesu bee-moos, fasilidade saúde inklui limitasaun pesoál saúde.

Governu prevee ona orsamentu ba Ministériu Saúde liuhosi Orsamentu Jerál Estadu (OJE) 2021 hamutuk $58.847.506 ho nia alokasaun ba kategoria lima mak hanesan saláriu vensimentu $23.928.890, bens serbisu $17.616.256, Kapitál Menór $1.920.256,  Kapitál Dezenvolvimentu $3.750.104  no Transferénsia públika $11.632.000.

Notísia Relevante:KFP-MS asina termu aseitasaun ho profisionál sáude 59

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here