Membru PNTL fahe adezivu ba motorista transporte públiku iha área rotunda Francisco Xavier do Amaral. Imajen Jogerjo Guterres

DILI, 20 fevereiru 2021 (TATOLI)—Estudante-sira iha munisípiu Dili konsidera kondutór mikrolete halo violasaun ba tarifa ne’ebé hatuur iha diploma ministeriál númeru 013/2012, 13 juñu ne’ebé sei válidu to’o ohin loron.

Konsiderasaun ne’e hato’o hosi estudante ensinu Sekundáriu 10 dezembru Comoro, Gabriel Mendonça  tanba baibain hosi hela fatin Vila-Verde ba eskola selu sentavu 0,15 maibé kondutór husu aumenta-tán sentavu 0,10.

Notísia Relevante:DNTT hahú moderniza atendimentu públiku

Alende ne’e, dala barak mós nia fó moeda kuarter (sentavu 0,25) maibé kondutór la fó fila osan restu.

“Ha’u sempre diskuti-malu ho kondutór-sira tanba ha’u selu kuarter maibé sira la fó fila osan restu,” Gabriel Mendonça hateten ba jornalista Agência Tatoli iha Comoro, sesta ne’e.

Nune’e mós estudante Universidade Nasionál Timor Lorosa’e (UNTL), Silvino Pereira preokupa tanba sempre enfrenta situasaun hanesan.

“Ha’u komprende kondisaun kondutór sira-nian, maibé ita diskuti-malu tanba de’it sentavu 0,10 ne’e estraga de’it ita-nia dignidade,” nia hateten.

Estudante Ensinu Tékniku Vokasionál Becora, Marito da Cruz mós lorloron hetan diskriminasaun tanba kondutór balun lakohi tula.

“Bainhira sira haree ami uza farda eskola-nian kondutór lakohi tula maski karreta mamuk hela. Ha’u sempre to’o eskola tarde tanba ha’u hela iha Comoro ba eskola iha Becora,” nia lamenta.

Estudante ne’e husu Governu atu labele husik situasaun ne’e kontinua no tenke halo kontrolu ba mikrolete sira iha Dili laran nune’e bele kumpri nafatin diploma ministerial ne’ebé iha ona.

Entretantu alterasaun despaixu ministerial númeru 013/2012, 13 juñu iha sirkunstánsia urbana pasajeiru estudante antes ne’e selu sentavu 0,10 no altera ba sentavu 0,15, enkuantu pasajeiru normál kontinua selu sentavu 0,25 no laiha alterasaun ne’ebé válidu to’o ohin loron.

Alende ne’e Diploma Ministerial númeru 2/2003/MTCOP, 3 outubru artigu 2 númeru 1 vigora tabela ida ba territóriu tomak la inklui estudante eskola sekundáriu sira iha munisípiu no postu administrativu sira.

Hosi diploma ministerial ne’e aplika tarifa ba liña rodaviáriu nasionál mak hanesan Dili-Manatuto kada pasajeiru selu $2.00, Dili-Baucau $4.00, Dili-Lospalos $8.00, Dili-Viqueque $8.00, Dili-Aileu $2.00, Dili-Same $9.00, Dili-Ainaro $8.00, Dili-Suai $12.00, Dili-Ermera $3.00, Dili-Liquiçá $2.00 no Dili-Maliana $6.00.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here