Diretór de Assessoria Juridicial Legislação hosi Ministériu Justisa, Nelinho Vital, hato’o hela nia aprezentasaun iha semináriu loron sorin ba komemorasaun Loron Mundiál ba Justisa Sosial. Imajen/Mídia XGRR.

DILI, 20 fevereiru 2021 (TATOLI)—Diretór de Assesoria Juridicial Legislação hosi Ministériu Justisa, Nelinho Vital, hateten igualidade partisipasaun sidadaun sira ba asesu justisa ne’e la’ós hanoin ba liu tribunál maibé oinsá povu hetan nia direitu lalais ho efikásia.

Notísia Relevante: Loron Mundiál Justisa Sosiál, PN husu Governu kumpre rezolusaun 21/2019

“Ha’u fiar katak bainhira ita ko’alia kona-ba asesu justisa dala barak ema hanoin oinsá sira bele asesu ba tribunal maibé asesu ba justisa ne’e signifika katak servisu hotu-hotu ne’ebé ligasaun ho justisa, liuliu oinsá povu hotu-hotu atu hetan nia direitu lalais ho efikásia. Tanba Ministériu Justisa (MJ) ne’e trata justisa jerál maibé kazu tribunál ne’e tribunál ninian, tanba Konstituisaun RDTL iha orgaun haat mak Prezidénte Repúblika, Parlamnetu Nasionál, Governu no Tribunál,” Nelinho Vitál hateten liuhosi nia aprezentasaun hodi reprezenta Ministru Justisa ne’ebé lori tema prinsipál “Igualdade Partisipasaun Sidadaun Sira Asesu Ba Justisa” iha semináriu loron sorin hodi komemora Loron Mundial ba Justisa Sosiál, iha Xanana Reading Room, Lecidere, Dili, sabadu ne’e.

Nelinho Vitál hatutan, tuir loloos bainhira ko’alia kona-ba asesu justisa oinsá atu atinji objetivu prinsipál ne’e mak agora Ministériu Justisa mak bele halo Sistema Justisa ida-ne’ebé mak efikásia iha nia prosesu tomak, ne’ebé justisa ne’e rasik sei aplika sai prosesu ida-ne’ebé lalais, ekilíbriu bele fó konfiansa, independente no justu.

“Asesu ba justisa ne’e atu dehan katak justisa ne’ebé lalais, simples no la karun. Ida ne’e mak ita hakarak iha Sistema justisa iha Timor-Leste. Ida-ne’e la’ós ba tribunál de’it maibé ba ema hotu-hotu,” Nelinho hateten.

Nia dehan, bainhra ko’alia kona-ba igualidade no partisipasaun sidadaun sira-nian ne’e, sei la sees hosi Konstituisaun Repúblika Demokrátika Timor-Leste (RDTL).

Imajen/Mídia XGRR.

“Tanba ne’e tuir lei ne’ebé iha konstituisaun RDTL, kompletu liu no garante katak ema hotu nia direitu hanesan, laiha diferensa entre feto no mane. Nune’e mós igualidade partisipasaun diretu ba feto no mane nian, laiha distinsaun ba ida-ne’e. Bainhira iha implementasaun ba lejislasaun, lei sira tuir mai  ba implementa konstituisaun RDTL mós  labele soke malu ho espíritu  konstituisan repúblika ninian. Tanba ne’e ita garante katak lei sira-ne’ebé sai iha Timor-Leste, labele iha diskriminasaun maibé tenke iha direitu hanesan,” nia subliña.

Tanba, nia esplika, espíritu ne’e mai hosi konstituisaun entaun iha ninia implementasaun  ne’e mós tenke garante asesu kualidade hanesan la haree ba feto, mane no rasa. Tanba, iha Timor-Leste, igualidade sidadaun sira-nian asesu ba justisa, sidadun ne’e iha direitu hanesan.

Entretantu, partisipante Igíldo Ximenes Guterres, sente kontente tebes bainhira partisipa semináriu loron sorin ba komemorasaun Loron Mundial Ba Justisa Sosiál tanba liuhosi semináriu refere nia bele hatene oinsá asesu justisa ne’e.

“Ha’u sente kontente tebes bainhira partisipa semináriu ba komemorasaun loron mundial ba justisa ne’e. Tanba, durante ne’e, hanoin justisa ne’e ba de’it mak oinsá atu hetan justisa hosi tribunal. Maibé liuhosi semináriu ne’e, ha’u bele hatene justisa nia lala’ok,” nia hateten.

Notísia Relevante: MSSI haree injustisa no lakohi tau Ema ho Defisiénsia iha kotuk

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here