Sekretáriu Jerál UDT, Francisco David Xavier Carlos. Imajen TATOLI/Evaristo Soares Martins.

DILI, 19 fevereiru 2021 (TATOLI)—Partidu União Democrática Timorense (UDT) forma ona ekipa halo preparasauun atu realiza kongresu nasionál ba-daneen.

Notísia Relevante: Deputadu Gilman Exposto Hakotu Iis Iha HNGV

Estrutura atuál forma ona ekipa iha loron 18 fulan-fevereiru 2021, iha sede UDT, Palapasso, Dili. Iha opurtunidade ne’e, Nicson Madeira Lay mak sai nu’udar Prezidente Komisaun Organizadora ba kongresu ba-daneen ne’e.

Sekretáriu Jerál UDT, Francisco David Xavier Carlos, hateten kongresu ne’e rasik sei uza osan hosi subvensaun públika ne’ebé atribui hosi Komisaun Nasionál Eleisaun (CNE-sigla portugés).

Nia hatutan, subvensaun públika ba UDT hamutuk rihun $92 bazea ba asentu parlamentár no osan ne’e mós durante ne’e utiliza reforsa estrutura partidu nian baze no kontaktu eleitorál.

“Ami jere ho kuidadu nune’e labele dependénsia ba sé de’it atu fó osan ba ami. Ami iha ajenda barak maibé ami sei halo lai kongresu depois estrutura foun mak implementa programa sira-ne’e. Neste momentu, tanba kestaun distansiamentu sosiál, ami labele halo buat ida. Maibé ekipa komisaun ba kongresu ami forma ona,” nia informa ba jornalista sira, iha Parlamentu Nasionál, sesta ne’e.

União Democrática Timorense (UDT) nu’udar partidu polítiku dahuluk ne’ebé funda iha loron 11 maiu 1974. UDT funda hosi Francisco Lopes da Cruz, Manuel Carrascalão, Mário Carrascalão, João Carrascalão no Domingos Oliveira.

Iha loron 27 juñu 1976, aviaun Cruz Vermelha Portugueza ida lori soldadu portugés na’in-23 no na’in-129 refujiadu timoroan hosi Atambua ba Portugál.

Liutiha tinan balun UDT hasoru difikuldade organizativa no hasoru mós reorganizasaun boot liu iha Kongresu Estraordináriu iha Lisboa iha fulan-dezembru 1993.

Hafoin Timor-Leste independénsia, João Guterres Viegas Carrascalão lidera UDT no Prezidente UDT ne’e mate troka hosi Gilman Exposto hodi lidera UDT.

Purtantu iha loron 25 novembru, Prezidente UDT Gilman Exposto dos Santos hakotu iis iha Hospital Nacional Guido Valadares (HNGV) tanba hetan atakasaun korasaun (kardiovaskulár).

Nune’e estrutura deside Rudolfo Aparício Guterres nu’udar Prezidente UDT Ein-Ezersísiu hodi hein rezultadu hosi kongresu nasionál ne’e.

Entretantu estrutura atuál kompostu hosi Prezidente UD Ein-Ezersísiu Rudolfo Aparício Guterres, Sekretáriu Jerál Francisco David Xavier Carlos, Primeiru Vise-Sekretáriu Jerál Clementino Gonçalves da Costa, Segundu Vise-Sekretária Jerál Deonaia da Silva no Terçeira Vise-Sekretária Jerál Cidália dos Santos. Estrutura tuan ne’e hili liuhosi kongresu dalima nian iha tinan hirak liubá.

Notísia Relevante: Francisco Ofisialmente Substitui Saudozu Deputadu Gilman Exposto

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here