Transportasaun mákina pezadu hosi Dili-Suai ho karga hamutuk 38, ba preparasaun perfurasaun mina-matan iha Kosta Sul. Imajen/Timor Resources

DILI, 19 fevereiru 2021 (TATOLI)—Ekipa tékniku empreza Timor Resources Pty.Ltd kontinua halo preparasaun halo manutensaun mákina Drilling Rig atubele halo perfurasaun ba mina-matan iha Kosta Súl, maski situasaun pandemia COVID-19 afeta mundu tomak inklui Timor-Leste.

Tuir planu, empreza australiana sei halo perfurasaun ba posu dahuluk iha área karau iha munisípiu Covalima no Manufahi iha insíu jullu tinan ne’e.

“Ami kontinua halo preparasaun ba perfurasaun no daudaun prosesu la’o hela, ein prinsípiu ita iha ajenda atu halo perfurasaun ba posu dahuluk tanba mákina sira agora konsetra hela iha posu área Karau, maibé ita espera COVID-19 la afeta ba esforsu sira ne’ebé halo ona,” Jestór Operasaun Timor Resources, Luís Pereira, informa ba Agência TATOLI, iha ninia knaar fatin, Timor-Plaza, sesta ne’e.

Iha loron 25 janeiru, ekipa tékniku estranjeiru ne’ebé mai Timór ba faze daruak to’o no kumpre ona kuaretena.

“Sira (ekipa tékniku) termina ona loron 14 iha kuaretena ne’ebé agora sai ona no hela iha asrama iha Ai-manu hodi kompleta ekipa tékniku na’in-10 ne’ebé mai iha faze dahuluk no hahú halo preparasaun,” nia akresenta.

Daudaun ne’e, ekipa tékniku sira hahú halo manutensaun liuliu junta ona ekipamentu atubele halo perfurasaun tuir kalendáriu ne’ebé iha ona.

Tuir Luís Pereira, mákina sira ne’e mai husi Estadu Unidu Amérika (EUA) ne’ebé tékniku sira maioria hosi Indonézia ne’e la envolve direta, ne’ebé presiza haree no junta didi’ak atu garante mákina ne’e kompletu.

“Ita haree ekipamentu ne’e kuandu ida falta mós ita presiza hameno mak ema prodús, nune’e ita tenke check didi’ak,” nia hatutan.

Hafoin halo manutesaun no instalasaun hotu mak ekipa Autoridade Nasionál Petróleu no Minerál (ANPM) avalia hodi fó sertifikadu hotu, hafoin bele halo perfurasaun.

“Ita-nia planu feitu ona, maibé depende ba COVID-19 tanba ita hakarak halo perfurasaun iha loron 01 jullu iha posu dahuluk ne’ebé kuaze loron 45 maibé muda fali ba posu daruak,” nia tenik.

Iha tinan 2017, hahú halo peskiza jeolójiku no estudu iha bloku lima no iha outubru 2018 hala’o ona teste sízmiku iha bloku A.  

Enkuantu, iha bloku C iha zona Betanu (entre Alas ho Hatudu) no teste vibroseis.

Nune’e, iha bloku A no ida-idak hosi perfurasaun tolu iha shallow-field to’o metru 2.000, ho ninia kalkulasaun kustu bele to’o milaun $35.

Enkuantu, bloku B haruka ona ba Timor Gás no Petróleu, Empreza Públika (Timor GAP,E.P) iha  Onshore Block, ne’ebé hanesan subsidiáriu hosi parte Timor-Leste.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here