Reprezentante SEKOMS no Atual Diretór DNPDML, Abel da Conceição, Asina Kontradu fundu transferensia publika ho Rádiu Komunidade munisípiu 12 inklui RAEOA, iha salaun ANC, Caicoli, sexta (19/02). Imajen TATOLI/Egas Cristovão

DILI, 19 fevereiru 2021 (TATOLI)—Secretário de Estado para a Comunicação Sociál (SECOMS), Merício Juvinal dos Reis ‘Akara’, husu ba jestór rádiu komunidade 16 ne’ebé asina kontratu fundu transferénsia públika 50% ne’e tenke jere ho di’ak.

Nia hatutan, maske subvensaun públika ne’ebé daudaun ne’e aloka ba rádiu komunidade menus kompara antes ne’e maibé tenke jere ho di’ak, nune’e funsionamentu rádiu tenke la’o nafatin.

Notísia Relevante: SECOMS apoiu fundu rihun $8-resin ba rádiu komunidade 16

“Ha’u hakarak ita-boot sira-ne’ebé ohin asina kontratu fundu transférensia públiku porsentu 50 tenke jere ho di’ak no tuir duni planu ne’ebé iha ona. Maske ita aloka fundu ba rádiu komunidade kompara ho tinan kotuk, osan tinan ida-ne’e tun liu tanba fundu antes osan rihun $15. Maibé, tinan ida-ne’e hetan de’it mak rihun $8-resin no hosi rihun $8-resin ne’e sei fahe ba dala rua. Maibé, ita tenke jere ho di’ak, nune’e funsionamentu rádiu tenke la’o nafatin,” Merício Juvinal dos Reis Akara hateten iha ninia diskursu ne’ebé hato’o hosi Asesór Legál SECOMS, José Pereira da Consenção, bainhira halo abertura ba serimónia asina kontratu fundu transferénsia públiku 50% ho radiu komunidade sira, iha Salaun ANC, Mercado Lama, Dili, sesta ne’e.

Nia apela ba jetór rádiu komunidade 16 katak maske daudaun ne’e orsamentu aloka ba rádiu kiik maibé jestór sira tenke jere ho di’ak, tanba objetivu prinispál rádiu komunidade nian mak tenke hato’o informasaun ba komunidade hotu ne’ebé mak presiza.

Entretantu, Jestór Rádiu komunidade Tokodede, Eduardo Exposto hateten, maske fundu ne’ebé SECOMS apoiu ba sira sente la sufisiente ba sira-nia programa maibé nu’udar jestór nia promote sei jere fundu transferénsia públika ne’e ho di’ak. 

“Orsamentu ba tinan ida-ne’e, ha’u sente la sufiesente, tanba programa ne’ebé ita hala’o ne’e mós barak. Maibé, nu’udár jestór, ha’u sei jere ho di’ak no sei kontinua nafatin iha kompromísu servisu. Osan iha ka laiha, ami mantein pozisaun,” Eduardo Exposto hateten.

Nia esplika, hosi fundu ne’ebé sira hetan sei haree ba programa prioridade lima mak hanesan produsaun notísia lokál, notísia online, Produsaun ba talk show, produsaun teatru ka drama, ikus mak produsaun mensajen badak sira.

Kona-ba rekursu umanu no fasilidade, nia dehan, ba rádiu komunidade Tokodede daudaun ne’e iha rekursu umanu ne’ebé natón no iha fasilidade ne’ebé sufisiente hodi bele fasilita sira-nia servisu.

“Rekursu umanu Rádiu Tokodede nian sufisiente tanba ami hetan apoiu voluntáriu hosi Juventude nivél Munisípiu Liquisa. Kona-ba fasilidade, ami iha komputadór lima, rua avaria, tolu mak agora daudaun ne’e uza hela ba atividade rádiu nian. Kona-ba transporte, iha 2015 SECOMS fó apoiu motor ida no iha 2019 apoiu tan motor ida. Ne’ebé, daudaun ne’e fasilidade kona-ba transporte ne’e sufisiente,” nia informa.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here