Primeiru-Ministru, Taur Matan Ruak, prezide reuniaun Konsellu Ministru estraordinária, iha Palásiu Governu, sesta (19/02). Imajen TATOLI/Egas Cristóvão

DILI, 19 fevereiru 2021 (TATOLI)-Ministru Ensinu Superiór, Siénsia no Kultura (MESSK), Longuinhos dos Santos, aprezenta opsaun polítika-Lejizlativa iha reuniaun Konsellu Ministru (KM) estraordinária, ne’ebé sai hanesan baze ba projetu lejizlativu ba kriasaun garantia finanseira ba liña kréditu ‘Ensinu Superiór Kualidade +’.

Tuir Ministru Prezidénsia Konsellu Ministru, Fidelis Manuel Leite Magalhães, opsaun ne’e destina ba apoiu finanseiru instituisaun ensinu superiór privada ne’ebé iha akreditasaun.

“Opsaun sira ne’e ba kriasaun liña kréditu ida ho taxa juru kiik, ho objetivu prinsipál atu fó dalan hadi’a kualidade ensinu superiór liuhosi asesu finansiamentu, ne’ebé instituisaun sira bele hadi’a infraestrutura no kapasita rekursu umanu,” Ministru Fidelis relata hafoin ramata reuniaun ezekutivu iha Palásiu Governu, sesta ne’e.

Portavós Governu ne’e dehan, karik opsaun ne’e hetan aprovasaun maka ensinu superiór sira bele asesu no kontempla posibilidade ba individuu sira atubele hetan fasilidade kréditu hodi nune’e kontinua edukasaun.

“Tuir aprezentasaun, kréditu sei oferese ho funan kiik, maibé daudaun ne’e iha faze aprezentasaun opsaun polítika-lejizlativa de’it no tempu tuir mai mak Ministériu Ensinu Superiór, Siénsia no Kultura sei aprezenta fali ba Ministru Prezidénsia Konsellu Ministru hodi halo analiza hamutuk ho tékniku sira hodi delibera iha reuniaun Konsellu Ministru tuir mai,” governante ne’e esplika.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here