Prezidente Komisaun A PN, Joaquim dos Santos. Imajen Tatoli/Egas Cristóvão

DILI, 19 fevereiru 2021 (TATOLI)—Komisaun A (Justisa no Konstituisionál) aprova ona relatóriu no paresér kona-ba Bankada Congresso Nacional de Reconstrução de Timorense (CNRT) walk out hosi diskusaun no aprovasaun Orsamentu Jerál Estadu (OJE) 2021 iha faze espesialidade.

Pedidu ne’e aprezenta hosi Prezidente Parlamentu Nasionál, Deputadu Aniceto Longuinhos Guterres Lopes, husu ba Komisaun A atu haree étika hosi deputadu bankada CNRT na’in-21 ne’ebé deside walk out iha momentu debate faze espesialidade OJE 2021 ne’e.

Rezultadu votasaun ba relatóriu no paresér ne’e a-favór 6, kontra 4 no abstensaun 1 no segunda-feira komisaun A sei submete ba Prezidente Parlamentu Nasionál.

“Ami aprova tiha ona Prezidente Parlamentu Nasionál nia pedidu kona-ba problema walk out, ne’ebé uluk ita maun-alin sira hosi Bankada CNRT halo ba OJE 2021. Ida-ne’e ami haree hosi matéria étika, rejimentu seidauk regula kona-ba asaun walk out ba tempu naruk, maibé walk out ne’e loron 6 kedas, ne’e mak prezidente uza nia kompeténsia hodi husu mai komisaun,” Prezidente Komisaun A, Deputadu Joaquim dos Santos, informa ba Agência TATOLI, iha Parlamentu Nasionál, sesta ne’e.

Prezidente Komisaun A ne’e halo peskiza, iha mundu ne’e ema seidauk halo walk out ba OJE tanba ne’e mak estrañu uitoan.

“Intermu étika, ita haree deputadu nia obediénsia ba partidu no bankada maibé tenke obedese ba misaun ne’ebé Estadu fó ba nia no povu fó ba nia. Ho situasaun dilemátiku ida-ne’e mak lori haree kestaun ne’e, la’ós haree de’it bankada CNRT maibé haree ba parlamentu tomak. Sira-ne’e (bankada CNRT) hanesan kazu ida. Se situasaun sira hanesan ne’e presiza regula ka la presiza,” nia subliña.

Komisaun A to’o iha konkluzaun katak iha futuru mai tenke haree fila-fali rejimentu nune’e aplika sansaun ba walk out ne’ebé ho tempu naruk liu ne’e konsidera hanesan saida.

Nune’e mós Komisaun A ne’ebé trata asuntu Justisa no Konstitusionál rekomenda ba futuru parlamentu tenke regula asaun walk out ne’e nune’e labele akontese tán.

“Maibé ne’e iha futuru, buat ne’ebé liu ne’e liu ona, agora ita la’o bá-oin. Deputadu na’in-haat mak vota kontra, ha’u labele dehan se mak vota kontra,” nia dehan.

Maibé deputadu sira hosi Bankada CNRT ne’ebé hola-parte iha Komisaun A komposta hosi Arão Noé de Jesus da Costa Amaral, Carmelita Caetano Moniz, Patrocínio Fernandes dos Reis no Oscar de Araújo.

Hatán ba kestaun ne’e, Vise-Xefe Bankada CNRT, Deputadu Patrocínio Fernandes dos Reis nu’udar mós membru Komisaun A, hateten iha rejimentu la define fó sansaun ba walk out ne’e tanba asaun polítiku.

“Iha momentu ne’e ami walk out tanba orsamentu 2021 ne’e artigu balun inkonstitusionál, tanba ne’e mak deside liuhosi diskusaun jeneralidade loron ikus katak ami sei la partisipa diskusaun no votasaun iha faze espesialidade. Ikus mai ami mós husu fiskalizasaun abstrata ba orsamentu ne’e tanba ami kestiona legalidade orsamentu ne’e,” nia fundamenta.

Jornalista: Evaristo Soares Martins

Editór: Cancio Ximenes


HAKEREK NO HATÁN

Please enter your comment!
Please enter your name here