Prezidente RAEOA no ZEESM TL, Arsenio Paixão Bano lidera enkotnru ho autoridade sira iha RAEOA. Imajen/Mídia RAEOA-ZEESM TL

DILI, 19 fevereiru 2021 (TATOLI) – Prezidente Autoridade Rejiaun Administrativu Oe-Cusse Ambeno (RAEOA) no Zona Espesiál Ekonomia Sosiál Merkadu Timor-Leste (ZEESM TL), Arsénio Paixão Bano, hamutuk ho nia ekipa no autoridade lokal sira partisipa iha enkontru aprezentasaun hosi Diresaun Rejionál Infraestrutura – DRI RAEOA kona-ba projetu reabilitasaun ba estrada rurál iha suku 5 (lima) Costa, Bobo-case, Malelat, Banafi no Bobometo ho total 20.7 km.

“Ha’u hanoin orsamentu RAEOA ne’ebé aloka ba projetu ida ho nia montante millaun  $5,8 ba tinan fiskál 2020-2021 ne’ebé kobre sub-rejionál haat,” Arsénio Bano, informa ba Agência TATOLI liuhosi telefone, sesta ne’e.

Arsenio Bano relata katak bazeia ba Planu Asaun Anuál programa tinan 2021 hosi Diresaun Rejionál Infraestrutura (DRI) liuhosi ninia Departamentu Estrada, Ponte no Kontrola Seias (EPCC) RAEOA nian sei reabilita estrada rurál hanesan estrada hosi Bihala ba to’o Kutete ho total 14 km, estrada hosi Malelat to’o Cussi ho total 4.2 km no Estrada hosi  Quiu-biselo ba  to’o Fatubasi ho total 2.5 km ba tinan 2021.

“Ha’u hanoin Autoridade RAEOA ba projetu Reabilitasaun no Manutensaun ba Estrada Rural sai hanesan prioridade prinsipál ba Autoridade RAEOA nian no mós hakarak aselera dezenvolvimentu infraestrutura fízika iha RAEOA bele fasilita no mobiliza komunidade sira nia vida loron-loron,” Arsenio Bano hateten.

Prezidente Autoridade RAEOA mós ko’alia kona-ba planu no programa importante sira hanesan konstrusaun no perfurasaun bee-moos, grande projetu no seluk-seluk tan ne’ebé sai hanesan prioridade prinsipál Autoridade RAEOA ba tinan 2021.

 Jornalista   : Domingos Piedade Freitas

Editor           : Francisco Simões

HAKEREK NO HATÁN

Please enter your comment!
Please enter your name here