Diretór Nasionál PCIC, Vicente Fernandes e Brito. Imajen Tatoli/Nelson de Sousa

DILI, 19 fevereiru 2021 (TATOLI)-Iha tinan 2020, Polísia Sientífika Investigasaun Kriminál (PCIC) simu delegasaun kompeténsia hosi Ministériu Públiku (MP) hodi halo investigasaun ba kazu 194.

Diretór Nasionál PCIC, Vicente Fernandes e Brito, informa prosesu krime sira-ne’e ninia natureza koletivu ho  komplexa ka organizadu ne’ebé tama iha kompeténsia PCIC hanesan omisídiu, burla agravadu, burla informátika, fraude fiskál, brankamentu kapitais ho sira seluk tan.

Notísia Relevante : PCIC-Laboratóriu Nasionál asina akordu kooperasaun iha area formasaun

Vicente Fernandes e Brito, ba jornalista sira iha nia knar fatin, edifísiu PCIC, Caicoli, Dili, sesta ne’e,  informa PCIC konklui hotu ona investigasaun hodi hato’o ona relatóriu finál ba Ministériu Públiku nu’udar na’in ba  asaun titulár penál hodi loke prosesu  tuir mai.

“Faze investigasaun ne’ebé hala’o kada prosesu iha prazu másimu  loron-90, maibé  prosesu ne’ebé nia natureza kompleksu tebes seidauk hotu,”  Vicente Fernandes e Brito hateten.

PCIC mós hala’o servisu hodi ezekuta mandadu detensaun, kumprimentu pena, mandadu detensaun primeiru interrogatóriu judisiál, mandadu notifikasaun ba julgamentu iha ne’ebé investigadór PCIC dezloka to’o ba iha munisípiu sira.

Daudaun ne’e PCIC iha investigadór na’in-75 no espesialista na’in-30 ne’ebé ninia rekursu umanu sufisiente nune’e mós ekipamentu hanesan laboratóriu  hodi atua servisu sira.

Dadus 2021 hosi inísiu janeiru to’o agora, PCIC simu delegasaun kompeténsia kazu besik 20, ne’ebé  maioria burla agravadu no falsifikasaun dokumentu ne’ebé iha hela prosesu inkéritu.

Jornalista   : Nelson de Sousa  

Editór        : Francisco Simões

HAKEREK NO HATÁN

Please enter your comment!
Please enter your name here