Prezidente Autoridade (PA) RAEOA, Arsénio Paixão Bano (klaran). Imajen/Mídia RAEOA.

DILI, 19 Fevereiru 2021 (TATOLI)—Prezidente Autoridade (PA) Rejiaun Administrativu Espesiál Oé-Cusse Ambeno-Zona Ekononia Eespesiál Sosiál Merkadu Timor-Leste (RAEOA-ZEESM-TL), Arsénio Paixão Bano informa, ohin, autoridade RAEOA realiza abertura kuotasaun ba konkursu Programa Cesta Bázika.  

Notísia Relevante: Semana oin, Governu lansa Programa Cesta Bázika iha RAEOA

Arsénio Paixão Bano hateten, programa cesta bázika nu’udar inisiativa ida hosi Governu iha ámbitu planu rekuperasaun ekonímiku ne’ebé fornese ai-han no produtu lokál sira.

“Cesta Bázika hanesan inisiativa ida iha ámbitu Planu Rekuperasaun Ekonómika ne’ebé fornese ai-han no produtu lokál sira ba ijiene pesoál nian ba populasaun hotu iha territóriu Timor-Leste tomak,” Arsénio Paixão Bano hateten ba Agência Tatoli liuhosi telefónika, sesta ne’e.

Nia hatutan, objetivu hosi medida ida-ne’e mak atu tulun família sira hodi hatán ba sira-nia nesesidade bázika sira hodi kontribui ba halakon hamlaha no vulnerabilidade ne’ebé eziste iha rejiaun balun hosi país ne’e, ne’ebé ki’ak no izoladu liu.

“Ha’u hanoin Governu hakarak fó apoiu ba agrikultór, produtór no komersiante lokál sira, atu estimula dinámika ekonómika lokál sira liuhosi sirkulasaun rekursu finanseiru sira-ne’ebé nesesáriu atu hasa’e produsaun nasionál hodi redús impaktu sira hosi krize ekonómika,” nia dehan.

Nia esplika, objetivu hosi abertura kuotasaun ba tenderizasaun programa cesta bázika ida-ne’e atu informa kona-ba ninia modalidade ba implementasaun husu programa cesta bázika ba kompañia sira-ne’ebé tuir konkursu ida-ne’e.

Imajen/Mídia RAEOA.

Arsénio Bano mós husu atu kompañia sira-ne’ebé manan ba konkursu ida-ne’e atu fornese ai-han no produtu ida-ne’ebé ijiene, saudavel no kualidade ba populasaun sira atu nune’e kumpre kriteria no regra ne’ebé Governu Sentrál no Autoridade RAEOA difine.

Iha biban hanesan, Sekretáriu Rejionál Adjuntu Prezidente Autoridade Asuntu Sosiál, Maximiano Neno mós hato’o prosesu preprarasaun servisu jestaun téknika tuir ninia regra no prosedimentu ne’ebé Governu Sentrál define antes implementasaun programa cesta bázika iha RAEOA.

“Hau hakarak informa kona-ba servisu aprovizionamentu RAEOA ninia lala’ok no simu sub-misaun ba konkursu programa cesta básika no totál empreza hamutuk 48. Maibé to’o ohin servisu aprovizionamentu RAEOA nian simu de’it empreza 25 ne’ebé hatama sira-nia proposta ba kuotasaun Cesta Bázka ne’e,” nia dehan.

Abertura ne’e hala’o iha Salaun Alfadega, Palaban, Pante Makassar, ne’ebé partisipa hosi Sekretáriu Rejionál Adjuntu Presidente Autoridade ba Asuntu Sosiál, Maximiano Neno, Sekretáriu Rejionál Asuntu Administrasaun, Martinho Abani Elu, Sekretáriu Rejionál Asuntu Agrikultura, José Eta, Sekretáriu Rejionál Asuntu Finansa, Elisa Maria Maniquin, PDHJ, Jestór Sub-Rejional haat, xefe suku 18, Sosiedade Civil no Emprezariu Lokál iha RAEOA.

Jornalista: Domingos Piedade Freitas

Editór: Cancio Ximenes

HAKEREK NO HATÁN

Please enter your comment!
Please enter your name here