Estudante eskola Ensinu Báziku Esperança da Pátria, Becora, Dili. Imajen TATOLI/Egas Cristóvão

DILI, 19 fevereiru 2021 (TATOLI)—Ministériu Edukasaun Joventude no Desportu (MEJD) laiha atividade ruma ba komemorasaun loron internasionál lian materna iha loron 21 fulan fevereiru tinan ne’e.

Ministru Armindo Maia fó sai ona katak, komemorasaun ba loron importante ne’e sei hala’o tuir kondisaun no situasaun atuál liuliu iha situasaun COVID-19.

Notísia Relevante:MEJD hapara hanorin lian materna iha eskola

“Tinan ida ne’e MEJD sei komemora loron internasionál lian materna tuir situasaun no kondisaun rai-laran nian. Tanba ne’e, sei laiha atividade ka eventu ruma ba loron importante ne’e,” Armindo Maia hateten ba jornalista Agência Tatoli iha Palásiu Governu, sesta ne’e.

Governante ne’e fó hanoin katak, MEJD rasik seidauk hatene kona-bá progresu hosi projetu lian materna ne’ebé implementa ona iha Munisípiu Lautém, Manatutu no Rejiaun Administrativa Espesiál Oe-cusse Ambeno (RAEOA) tanba seidauk halo avaliasaun.

Nia dehan, bainhira halo ona avaliasaun no iha rezultadu ne’ebé hatudu progresu ruma maka bele sai referénsia ba MEJD atu bele espande projetu ne’e ba Munisípiu sira seluk.

Organizasaun Mundiál ba Edukasaun Siénsia no Kultura (UNESCO) komemora ona loron internasionál lian materna durante tinan 20 ho objetivu atu konserva nafatin diversidade língua no halo promosaun ba edukasaun multilíngua ho baze lian materna.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here