Ministru Finansa, Rui Augusto Gomes. Imajen TATOLI/Egas Cristóvão

DILI, 19 fevereiru 2021 (TATOLI)-Ministru Finansa, Rui Augusto Gomes,  informa daudaun ne’e konta tezouru sufisiente finansia despeza funsionamentu mákina Estadu, nune’e la nesesáriu halo levantamentu fundu petrolíferu.

Antes ne’e, iha inísiu fevereiru tinan ne’e konta tezouru hamutuk millaun $266, maibé agora tun ona.

“Osan iha konta tezouru hamutuk millaun $238, ne’ebé seidauk iha nesesidade atu halo levantamentu,” Ministru Rui Gomes, informa iha edífisiu Ministériu Finansa (MF), Aitarak-laran, sesta ne’e.

Tuir Ministru, kada tinan, MF halo levantamentu fundu petrolíferu maibé la’ós iha trimestre dahuluk, karik bele iha fulan-maiu ou juñu tanba osan iha kaixa tezouru sufisiente.

Alende ne’e, konta tezouru mós kada fulan rekolla reseita doméstika millaun $12 to’o millaun $15.

“Kada fulan, Ministériu Finansa mós rekolla hela impostu ne’ebé osan sira ne’e iha hela, ita foti osan fundu petrolíferu, depois rai de’it funan laiha, entaun husik osan ne’e iha li’ur atu iha funan oituan,” Ministru esplika.

Notísia relevante: BCTL garante EUA la impede transferénsia fundu petrolíferu

Aleinde ne’e, MF mós halo monitorizasaun  ba konta tezouru kada loron, ne’ebé bainhira despeza la sufisiente bele halo pedidu levantamentu ba Banco Central de Timor-Leste (BCTL) atu halo korrespondésia ho Banku Federál Amérika hodi transfere osan mai Timor-Leste.

“Ita labele selu projetu sira ne’ebé seidauk hahú ka seidauk halo tanba agora mak foin hahú halo aprovizionamentu, kuandu projetu sira ne’e seidauk tama mai kompletu, ita atu selu bazeia ba saida?,” nia esklarese.

Ekonomista timor-oan ne’e hatutan, kona-ba orsamentu kada ministériu, sira iha ninia orsamentu rasik ne’ebé bele ezekuta tuir programa no planu prioridade sira.

Nune’e, nia apela ba públiku atu labele tau kestaun ba levantamentu OJE 2021, tanba Governu iha mekanizmu rasik hodi sustenta mákina Estadu.

Biban ne’e, governante ne’e rejeita rumoris ne’ebé espalla iha públiku katak bainhira halo levantamentu fundu petrolíferu presiza asinatura husi líder nasionál balun.

“Ami bainhira haree despeza sira iha konta tezouru la sufisiente ona, kualker tempu Governu liuhosi Ministériu Finansa bele halo pedidu levantamentu ba Banku Sentrál,” nia afirma.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here