Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu. Imajen Tatoli/António Gonçalves

DILI, 19 fevereiru 2021 (TATOLI)—Konsellu Ministru (KM) kontinua ezije ba Ministru Edukasaun Joventude no Desportu (MEJD) uza kompeténsia hasai despaixu ida atu hapara atividade eskolár iha área fronteira hodi kontribui ba prevensaun COVID-19.

Ministru Armindo Maia, hateten maski seidauk iha desizaun maibé MEJD konsidera ezijénsia ne’e no sei hasai despaixu-ruma atu hapara prosesu ensinu aprendizazen.

Notísia Relevante:PN husu MEJD hasai desizaun ba atividade eskolár iha Bobonaro-Covalima

“Durante enkontru prevensaun COVID-19 ba Munisípiu tolu iha liña fronteira, ami diskuti mós asuntu ne’e. Posibilidade MEJD sei uza ninia kompeténsia hodi hasai despaixu-ruma kona-bá situasaun eskola-sira iha fronteira,” Armindo Maia hateten ba jornalista Agência Tatoli iha Palásiu Governu, sesta ne’e.

Governante ne’e konsidera desizaun ne’ebé sei foti importante duni atu tulun estudante-sira iha situasaun COVID-19 nian, tanba KM deside ona hodi hapara movimentu iha liña fronteira.

Nia promete sei halo diskusaun rigorozu liu-tán molok foti desizaun atu hasai despaixu ne’e, nune’e labele prezudika ema barak.

Bainhira iha ona desizaun, Armindo Maia sei fó-sai despaixu ne’e atu bele fó biban ba Diretór Serbisu Edukasaun Munisipál tolu bele ezekuta.

Antes ne’e MEJD fó ona orientasaun verbál ba Diresaun Jerál Edukasaun Pre-Eskolár Ensinu Báziku no Ensinu Rekorrente (EPEBER) hodi hapara provizóriu atividade eskolár ba eskola 28 iha Bobonaro, 33 iha Covalima, 32 iha RAEOA  no 1 iha Dili.

Alende ne’e iha kinta (18/02) Inspetór Jerál Edukasaun Munisípiu Covalima, hasai karta sirkulár hodi suspende provizóriu prosesu aprendizajen ba eskola sira iha Covalima hahú hosi loron 19 fevereiru to’o loron 03 marsu 2021.

Notísia Relevante:Edukasaun Covalima suspende prosesu aprendizajen

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here