Primeiru-Ministru, Taur Matan Ruak, prezide reuniaun Konsellu Ministru estraordinária, iha Palásiu Governu, sesta (19/02). Imajen TATOLI/Egas Cristóvão

DILI, 19 fevereiru 2021 (TATOLI)Governu delibera ona atu propoin ba Prezidente Repúblika (PR), Francisco Guterres ‘Lú Olo’, atu halo renovasaun Estadu Emerjénsia (EE) ba dala-11, ba loron 30.

EE faze da-sanulu abranje territóriu nasionál tomak no vigora iha tuku 00:00 loron 02 fevereiru  2021 no sei ramata iha tuku 23:59 loron 03 marsu 2021.

Ministru Prezidénsia Konsellu Ministru, Fidelis Manuel Leite Magalhães, hateten inisiativa ne’e tanba haree ba mudansa situasaun epidemiolójika no proliferasaun kazu rejistadu kontájiu COVID-19, tantu iha nível rejionál no nível mundiál.

“Atu evita no neutraliza risku COVID-19 no proteje saúde públika inklui iha kbiit atu hatán ba Sistema Nasionál Saúde nian, Governu propoin ba Prezidente Repúblika halo renovasaun Estadu Emerjénsia, nune’e permite suspende direitu no garantia fundamentál balun,” Ministru Fidelis informa hafoin reuniaun ezekutivu, iha Palásiu Governu, sesta ne’e.

Iha proposta foun ne’e sei hato’o ba Prezidente Repúblika ho ninia natureza jerál nafatin ho ida-ne’ebé sei vizente hela, maibé iha espesifikasidade balun atu halo klaru liután.

“Ida mak relasiona ho autorizasaun, ne’ebé iha karta Governu sei husu mós ba Prezidente Repúblika atu autoriza FALINTIL-Forsa Defeza Timor-Leste (F-FDTL) halo atividade iha fronteira terrestre hamutuk ho Polísia Nasionál Timor-Leste (PNTL) atu prevene pasajen ilegál sira,” nia esplika.

Aleinde ne’e, iha pedidu ne’e inklui mós klaúzula ida atu halo klaru liután posibilidade atu suspende rejime edukasaun.

“Nune’e, bainhira Governu halo suspensaun ba atividade aprendizajen, iha karta ne’e refleta ona tanba ámbitu ba labarik sira-nia direitu iha ona autorizasaun ba Estadu Emerjénsia ne’ebé sei konkorda karik haruka ba Parlamentu Nasionál hodi autoriza,” governante ne’e akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here