Primeiru-Ministru, Taur Matan Ruak, prezide reuniaun Konsellu Ministru estraordinária, iha Palásiu Governu, sesta (19/02). Imajen TATOLI/Egas Cristóvão

DILI, 19 fevereiru 2021 (TATOLI)-Governu liuhosi reuniaun Konsellu Ministru (KM) estraordinária iha sesta ne’e, deside kria tan munisípiu ida no postu administrativu rua iha Timor-Leste. 

Desizaun ne’e propoin hosi Ministru Administrasaun Estatál, Miguel Pereira de Carvalho, liuhosi Projetu Proposta Lei ba alterasaun daruak hosi lei númeru 11/2009, loron 07 outubru kona-ba divizaun administrativa territoriál.

“Proposta lei ne’ebé hetan aprovasaun iha Konsellu Ministru sei submete ba Parlamentu Nasionál, ho objetivu atu sirkunskrisaun administrativa foun ida ho eskalaun dahuluk hanesan territóriu, illa Ataúro maka baze ba postu administrativu Ataúro, munisípiu Dili la eziste ona,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu iha Palásiu Governu, sesta ne’e.

Aleinde ne’e,  Proposta Lei ne’e mós iha objetivu atu kria postu administrativu Hatulia B, iha munisípiu Ermera, liuhosi divizaun sirkunskrisaun administrativa atu korrespondente ba postu administrativu Hatulia.

Enkuantu, iha munisípiu Lautém, ho alterasaun proposta ne’e sei kria postu administrativu Loré, liuhosi divizaun sirkunskrisaun administrativa ne’ebé korresponde ba postu administrativu Lospalos.

Proposta Lei ne’e hafoin finaliza redasaun finál sei lori ba Parlamentu Nasionál hodi halo diskusaun.

Jornalista: Antónia Gusmão

Editora: Julia Chatarina

2 KOMENTÁRIU

  1. Senhor Ministro Administracao Estatal, tenki hare mos Posto Administrativo Bobonaro desde uluk too ohin loron ho suco 18. Sera que ba oin bele considera fahe tiha ba rua ka tolu.

HAKEREK NO HATÁN

Please enter your comment!
Please enter your name here