Ministru Finansa, Rui Augusto Gomes, prezide QDPM iha salaun Ministériu Finansa, Aitarak-laran, sesta(19/02). Imajen TATOLI/Egas Cristóvão

DILI, 19 fevereiru 2021 (TATOLI)-Governu liuhosi Ministériu Finansa (MF) organiza enkontru hanaran Quarterly Development Partners Meeting (QDPM) hodi atualiza no aprezenta planu rekuperasaun ekonómika inklui preparasaun Orsamentu Jerál Estadu (OJE) 2021 no planu nasionál vasinasaun kontra COVID-19 ba parseiru dezenvolvimentu sira.

Ministru Finansa, Rui Augusto Gomes, hateten enkontru ne’e ho objetivu atu troka opiniaun no aprezenta projetu no programa sira inklui polítika VIII Governu Konstitusionál atu hetan apoiu ne’ebé bele aliña ho programa ne’ebé iha.

“Ita aprezenta programa sira ba parseiru dezenvolvimentu atu hein sira-nia apoiu no programa ne’ebé aliña ho ita-nia programa no polítika Govevernu,” Ministru Rui Gomes, hateten hafoin enkontru iha Salaun Auditórium Ministériu Finansa, Aitarak-laran, Dili, sesta ne’e.

Membru Governu sira hasai foto hamutuk ho parseiru dezenvolvimentu sira iha ámbitu QDPM, iha edífisu Ministériu Finansa. Imajen TATOLI/ Florêncio Miranda Ximenes

Iha ekontru ne’e, Governu aprezenta ona polítika rekuperasaun ekonómika, planu no programa ne’ebé orsamenta ona iha tinan fiskál 2021.

“Ita-nia objetivu atu aprezenta ba parseiru dezenvolvimentu sira atu aliña sira-nia programa ho ita-nia atu labele halo ketak-ketak,” nia akresenta.

Aleinde ne’e, aprezenta mós planu nasionál ba vasinasaun kontra COVID-19 ba sidadaun Timor-Leste.

Iha biban ne’e, Governu aprova mós rezolusaun ba planu nasionál vasinasaun kontra COVID-19, nune’e halo mós diskusaun ho parseiru dezenvolvimentu sira.

“Embaixadór Austrália mak aprezenta kona-ba planu atu halo vasinasaun tanba Governu mós aprova ona ne’ebé ita ko’alia hela atu labele iha duplikasaun. Tanba kontribuisaun parte Governu iha inklui doasaun sira mós iha liuliu parte Austrália,” nia hatutan.

Ministru Finansa, Rui Augusto Gomes. Imajen TATOLI/Egas Cristóvão

Hafoin aprezenta planu no programa, parseiru dezenvolvimentu sira apresia tebes no entre sira balun hakarak apoia atividade Governu.

Parseiru dezenvolviementu sira mós husu ba Governu atu kontinua realiza sorumutuk atu apoiu ne’ebé fó labele soke malu ho programa.

“Ita hakarak halo programa hanesan ne’e bebeik atu iha diálogu, atu programa labele soke malu no ida-idak hala’o ninian, hodi bele aliña ho programa sira atu iha efeitu boot liu ba ekonomia sosiedade,” tenik governante ne’e.

Enkontru ne’e partisipa hosi membru Governu balun, parseiru dezenvolvimentu sira no embaixadór estrajeiru sira iha Timor-Leste.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here