Ekipa Vijilánsia Ministériu Saúde hala’o teste screening ka teste swab ba abitante sira iha Aldeia Makokon, Suku Nanu, Postu Fatumea-Covalima. Imajen Tatoli/Eugénio Pereira

COVALIMA, 19 fevereiru 2021 (TATOLI)-Ekipa Vijilánsia Ministériu Saúde foti ona amostra teste screening ka  swab obrigatóriu ba abitante na’in-368 ne’ebé horik iha pontu entrada Munisípiu Cavalima.

Notísia Relevante : Edukasaun Covalima suspende prosesu aprendizajen

Amostra swab hirak-ne’e, ekipa MS rekolla hosi abitante sira refere dezde iha loron 16 to’o loron 19 fevereiru, tinan ne’e.

Ekipa Vizilansia Ministériu Saúde konfirma lista naran komunidade sira ne’ebé tuir teste screening ka swab iha Aldeia Makokon, Suku Nanu, Postu Fatumea-Covalima. Imajen Tatoli/Eugénio Pereira

Responsavel Vijilánsia Saúde Munisipál Covalima, Enfermeiru Serafin Moniz, hateten dadus teste screening obrigatóriu ne’e hala’o ona iha Postu Administrativu Tilomar iha suku rua, Postu Administrativu Fatumea ba  suku tolu no Fatululikba  suku rua.

Nia hateten, ekipa rekolla uluk iha área  Suku Beiseuk, Mota Masin, Wetabak, Fatumea, Walu, inklui Postu Unidade Patrullamentu Fronteira (UPF), Maubisse,  Postu F-FDTL Nikir Tilomar, Munisípiu Covalima nian.

“To’o agora ami halo ona teste screening  obrigatóriu ka teste swab ba populasaun iha liña fronteira hamutuk 368,” Serafin Moniz hateten ba Agência TATOLI iha Aldeia Makokon, Suku Nanu, Postu Administrativu Fatumea, Cavalima, sesta ne’e.

Kona-ba amostra sira ne’ebé ekipa rekolla ona, lori kedas ba Laboratóriu Nasionál iha Dili hodi halo analiza tuir lista naran komunidade nian hodi halo identifikasaun no sei fó sai rezultadu ba komunidade sira hodi evita transmisaun surtu COVID-19.

Ekipa Saúde Nasionál no munisipál apresia tebes komunidade sira-nia  entuziazmu hodi partisipa iha programa swab ne’e.

Médiku ne’e konsidera teste swab ne’e importante tebes ba abitante sira ne’ebé hela iha liña fronteira hodi kuidadu sira nia aan, tanba sira hela baliza kedas ho nasaun viziñu Indonézia.

Alvu hosi Ministériu Saúde nian ba populasaun Covalima ne’ebé hela iha liña fronteira sei foti amostra 700.

Iha fatin hanesan, Administradór Postu Administrativu Fatumea, Filomeno Cardoso  ho Xefe Aldeia Makokon, Suku Nanu, Postu Fatumea, Leonito do Carmo, hato’o agradese ba inisiativa Governu Timor-Leste hodi halo teste ba nia komunidade sira.

Iha Fatumea rasik abitante suku tolu hanesan, Beelulik Leten, Fatumea no Nanu ho totál populasaun 4.286 hela iha fronteira baliza ho viziñu Malaka-Indonézia tanba ne’e presiza konsiénsia no kolaborasaun atu hamutuk luta kontra peste letál Covid-19 liuhosi evita tama-sai ilegál iha liña fronteira Timor-Leste ho Indonézia.

Na’in-rua tama ilegál

Iha parte seluk, Administradór Fatumea, Filomeno Cardoso, informa iha segunda (15/02), sira-nia parte koopera ho ekipa Forsa Konjunta PNTL no F-FDTL detein Timoroan na’in-rua   ne’ebé halo viajen ilegál hosi Atambua mai Timor-Leste liuhosi fronteira Covalima.

Sidadaun rua ne’e sai hosi Timor-Leste ne’e ba Atambua hodi partisipa serimónia funerál sira-nia inan mate, no sira fila-fali  mai Timor-Leste atu ba Dili tama liu dalan ilegál iha fronteira Bebiloku-Anin Matan Covalima.

Abitante na’in-rua ne’e sei hela iha kuarentena durante loron 14 remata no sei entrega fali hodi halo prosesu, tanba viola regra Estadu Emerjénsia.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here