Diretór Nasionál PCIC, Vicente de Brito, Xefe Delegasaun Uniaun Europeia nian iha Timor-Leste, Embaixadór Andrew Jacobs ho Embaixadór Portugál nian iha Dili, José Pedro Machado Vieira. Imajen/Espesiál

DILI, 18 fevereiru 2021 (TATOLI)-Iha ámbitu Projetu Apoiu ba Konsolidasaun  Estadu Direitu (PACED) ba Paises Africanos de Lingua Oficial Portuguesa  (PALOP) no iha Timor-Leste, iha sede Polísia Sientífika Investigasaun Kriminál (PCIC) nian, iha Dili, grupu dahaat ekipamentu laboratóriu nian entrega ona  ba Polísia Sientífika no Investigasaun Kriminál (PCIC), atu haforsa sira-nia kapasidade iha prevensaun no kombate hasoru krime organizadu.

Tuir komunikadu imprensa ne’ebé Agência TATOLI asesu kinta ne’e katak, materiál, fundamentál sira ba dezempeñu investigasaun nian, ho valór dolar rihun haat nian, sei entrega ba Diretór Nasionál PCIC, Vicente de Brito hosi Xefe Delegasaun Uniaun Europeia nian iha Timor-Leste, Embaixadór Andrew Jacobs, no hosi Embaixadór Portugál nian iha Dili, José Pedro Machado Vieira.

Resenseamentu materiál ne’e nian ba laboratóriu PCIC nian tama iha apoiu luan liuhosi PACED, atu hatán ba nesesidade husi parseiru nasionál timoroan sira, no fó tuir kolaborasaun regulár ho autoridade Timor-Leste nian oioin,

“Doasaun materiál ba PCIC ne’e hanesan parte ida hosi PACED nia apoiu ne’ebé luan atu hatán ba nesesidade hosi parseiru nasionál sira Timor-Leste nian, ne’ebé inklui mós Ministériu Justisa, Tribunál Rekursu, Prokuradoria-Jerál Repúblika, Sentru Formasaun Jurídika no Judisiária, no Unidade Informasaun Finanseira, ho  akompañamentu hosi servisu sira Núkleu Apoiu ba Ordenadór Nasionál – Ministériu Negósiu Estranjeiru no Kooperasaun,” nota komunikadu  ne’e haktuir.

PACED iha orsamentu hamutuk millaun $10,15, kompostu hosi  $8,46 ne’ebé finansia hosi Uniaun Europeia no millaun $1,69 hosi Camões – Instituto da Cooperação e da Língua, I.P., ne’ebé jere projetu ne’e.

PACED iha ninia objetivu sira maka afirmasaun no konsolidasaun Estadu Direitu nian iha nasaun  PALOP no Timor-Leste, nune’e mós prevensaun no luta hasoru korrupsaun, brankamentu kapitál no krime organizadu, liuliu tráfiku droga.

Ninia intervensaun foka liubá asaun sira ne’ebé ho objetivu atu dezenvolve kapasidade institusionál hosi autoridade kompetente sira iha nivel lejizlativu, ezekutivu no judisiál, hodi promove interkámbiu no fahe koñesimentu no prátika di’ak sira.

Tuir índise persesaun korrupsaun nian, ne’ebé fó sai hosi Transparénsia Internasionál, hosi nasaun haat hosi parseiru Projetu PACED nian, hadi’a sira-nia pozisaun iha tinan 2020. Klasifikasaun ne’e avalia nasaun 180 tuir nivel persesaun kona-ba korrupsaun iha setór públiku.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here