Inspetór Jerál Traballu, Rofino Lopes dos Reis. Imajen TATOLI/Antónia Gusmão

DILI, 18 fevereiru 2021 (TATOLI)–Inspesaun Jerál ba Traballu (IGT, sigla portugés), durante halo serbisu iha tinan 2020, konsege hatama reseita $273.754, maioria mai hosi multa no auto adverténsia ne’ebé aplika ba kompañia komete infrasaun.

“Ami-nia vizita inspesaun konsege deteta infrasaun kompañia hamutuk 400-resin no hosi númeru ne’e kontribui ba reseita Estadu hamutuk $273.754,” Inspetór Jerál Traballu, Rofino Lopes dos Reis, informa, kinta ne’e ba Agência TATOLI, iha ninia knaar fatin, iha Hudi laran.

Tuir responsável ne’e, kompañia  ne’ebé komete infrasaun barak liu laiha garantia seguransa serbisu ba traballadór iha serbisu fatin, halo violasaun direitu salariál traballadór, liu-liu iha oras serbisu, renovasaun vistu no vistu mate.

Bainhira IGT detekta infrasaun grave, kompañia sira selu multa tuir lei traballu nian, maibé kuandu laiha grave maka fó deit auto adverténsia, ne’ebé iha tinan 2020 nia laran konsege aplika ba kompañia hamutuk 46.

Inspetór ne’e nota katak hosi inspesaun sira, kompañia internasionál mak komete infrasaun barak liu.

“Ami detekta kompañia internasionál maka komete infrasaun barak liu, kompara ho kompañia internasionál, tanba ne’e auto adverténsia ami fó barak liu ba kompañia internasionál,” nia akresenta.

Entertantu, iha tinan 2020 IGT halo atividade inspesaun 1.200 no iha atividade ne’e rasik deteta traballadór hamutuk 18.590 maka serbisu iha kompañia.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here