Konsultasaun públika sistema identidade únika, iha Suai Room, Timor Plaza, kinta (18/02). Imajen TATOLI/Natalino Costa

DILI, 18 fevereiru 2021 (TATOLI)Agência de Tecnologia da Informação e Comunicação Timor, Institutu Publiku (TIC Timor, I.P), halo konsultasaun públika hamutuk ho liña ministériu na’in-ualu inklui parseiru dezenvolvimentu, hodi ko’alia kona-ba estratejia sistema identidade únika (Unique ID) hodi bele integra ho Governu eletrónika (e-Goverment).

Ministétriu ualu ne’ebé liga ho baze dadus mak hanesan Ministériu Justisa (MJ), Ministériu Solidaridade Sosiál No Inkluzaun (MMSI), Ministériu Saúde (MS), Ministériu Edukasaun Juventude no Desportu (MEJD).

Tuir Diretór Ezekutivu TIC Timor, Roberto Caetano de Sousa Vicente, objetivu implementasaun sistema identidade únika ne’e nu’udár meiu ida Governu hakarak moderniza sistema servisu administrasaun públika, liuliu ba atendimentu relasiona ho baze dadus.

“Ministériu balun hanesan Ministériu Justisa bainhira serbisu hamutuk ho Ministériu Solidaridade Sosiál kona-ba bolsa da mãe, iha prosesu ne’e  fasilita dokumentu ladún di’ak to’o ikus mai ema ne’ebé mate mós sei kontinua rejistu nafatin tanba  ita laiha sistema ida loloos,” Diretór Ezekutivu relata iha kinta ne’e, iha Suai Room, Timor Plaza.

Notísia relevante: TIC Timor halo aprezentasaun sistema identifikasaun únika molok ba KM

Aleinde ne’e, iha ámbitu implementasaun Estadu Emerjénsia (EE) iha tinan kotuk, Governu fó subsídiu ba uma-kain hamutuk $200, maibé susar atu identifika reklamasaun sira.

“Ita laiha sentru informasaun ida atu fortifika ema ne’e iha duni ka lae tuir saida maka nia deklara,” nia akresenta.

Entaun, bainhira implementa identidade únika sei rezolve problema hirak ne’e.

“Programa ne’e rasik ita bele uza hodi halo tratamentu karta kondusaun,  loke konta bankária no sei loke mós  espasu ba servisu sira seluk,” nia hatutan.

Aleinde ne’e, ba oin Governu bele uza sistema ne’e hodi simplifika prosesu eleitorál.

“Bainhira ema ba vota iha fatin seluk, nia labele vota tan fali iha fatin seluk. Nia tenke vota iha fatin ida nia uza duni identifikasaun, tanba ne’e liuhosi programa identidade únika, dadus mate klamar sira ne’e labele bosok ona,” dehan Roberto.

Nia konsidera, Governu tenke presta servisu di’ak ba sidadaun sira tanba sidadaun hola parte iha servisu ne’e, ne’ebé sei hetan apoiu lalais bainhira hetan ona númeru identifikasaun.

Implementasaun sistema ne’e sei fó vantajen ba esbosu lei kona-ba protesaun dadus no privasidade.

Konsultasaun implemetasaun sistema identidade únika sei envolve mós sosiedade sivíl no entidade relevante seluk.

Iha fatin hanesan, Ministru Prezidénsia Konsellu Ministru, Fidelis Manuel Leite Magalhães, hateten presenza Governu iha seremónia ne’e atu haree liña ministeriál no entidade relevante ba implementasaun projetu identidade úniku.

“Agora sei iha faze konsultasaun, bainhira finaliza ona maka sei submete ba Konsellu Ministru,” nia informa.

Tuir governante ne’e, presiza halo konsultasaun  antes implementasaun hodi nune’e ema hotu hola parte no bele entende didi’ak identidade únika ninia objetivu no benefísiu ba sidadaun sira.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here