DILI, 18 fevereiru 2021 (TATOLI)-Ministru Justisa (MJ), Manuel Cárceres da Costa, kinta ne’e, iha edifísiu MJ, Dili, simu audiénsia ho Padre Julio Crispin no reprezentante hosi Komisaun Justisa no Paz, hodi ko’alia kona-ba konkordata Estadu Timor-Leste ho Estadu Santa-Sé.
Nota komunikadu hosi Gabinete MJ ne’ebé Agência TATOLI asesu relata katak enkontru ne’e ho objetivu hodi diskute pontu importante tolu mak hanesan; dahuluk, implementasaun akordu Estadu TL ho Estadu Santa-Sé ba parte personalidade jurídiku ba fundasaun sira hosi organizasaun sira iha Igreja Katólika nia-mahan (ba kongregasaun sira iha Timor-Leste).
Daruak; efeitu sivíl hosi kazamentu katóliku no mós sei hamosu lei kona-ba liberdade relijioza no mós kódigu rejistu sivíl no datoluk, ko’alia mós kona-ba bens imoveis igreja nian iha Timor-Leste ne’ebé sei rezolve liuhosi komisaun ad hoc iha futuru.
“Kona-ba efeitu sivíl bá kazamentu katólika nian, ida-ne’e hakerek iha kódigu rejistu sivíl ne’e tuir hanesan konkordata nian. Ne’ebé ida-ne’e la iha problema,” Manuel Cárceres hateten.
Nia hateten, kona-ba kestaun bens no imóveis mak Governu hein proposta hosi Konferénsia Episkopál Timorese (CET) atu kria komisaun ad hoc hodi trata asuntu ne’e hamutuk.
Jornalista : Nelson de Sousa
Editór : Francisco Simões
