Primeiru-Ministru, Taur Matan Ruak. Imajen TATOLI/Egas Cristovão

DILI, 18 fevereiru 2021 (TATOLI)—Primeiru-Ministru, Taur Matan Ruak, hateten maski seidauk halo levantamentu osan fundu petrolíferu iha Banco Central de Timor-Leste (BCTL, sigla portugés) ba tinan fiskál 2021, maibé iha kompromisu atu implementa programa ne’ebé orsamenta ona. 

“Seidauk halo levantamentu ne’e, sei la implika ba dezenvolvimentu nasionál no imposível Governu ida halo ona programa no tau tiha orsamentu, maibé nia lakohi implementa fali ne’e imposível no laiha lójika,” Xefe Governu dehan hodi hatan ba pergunta jornalista sira kona-ba Governu seidauk halo levantamentu, iha Palásiu Prezidensiál, Bairro Pité, kinta ne’e.

Notísia relevante: Konta tezouru millaun $266 sufisiente atende despeza trimestre dahuluk

Biban ne’e, PM husu atu públiku labele preokupa demais kona-ba levantamentu orsamentu tinan 2021 tanba konta tezouru sei sufisiente atu sustenta mákina Estadu.

“Informasaun ne’ebé ha’u simu hosi Ministériu Finansa seidauk iha nesesidade atu halo levantamentu, maibé kuandu iha nesesidade obriga maka sei halo levantamentu, tanba ne’e lalika preokupa,” Xefe Ezekutivu afirma.

Alende ne’e, nia husu ba públiku bainhira fó opiniaun ruma relasiona ho levantamentu osan presiza aprezenta faktu, nune’e la kria fali konfuzaun.

“Ha’u hanoin di’ak liu lalika rona rumoris ne’ebé la’o tun, la’o sa’e, tanba ema dehan Timór ne’e ema matenek tanan-tanan de’it, maibé levantamentu ne’e la’ós kestaun hanesan ema matenek,”nia akresenta.

Entertantu, Ministériu Finansa liuhosi Diresaun Jerál Tezouru deklara ona katak konta tezouru iha hela millaun $266 ne’ebé sufisiente sustenta mákina Estadu ba trimestre dahuluk tinan ne’e.

Jornalista: Florêncio Miranda Ximenes

Editora: Julia Chatarina

1 KOMENTÁRIU

  1. nudar sidadaun timor oan konkorda PM Taur Matan Ruak,tanba governu anterior foti osan gasta arbriu deit, tanba ne mak to;o agora fundo mina rai biliaun 20 resin foti maibe povo kontinua moris kiak,desenvolvimento La-lao..tuir hau nia hanoin governo foti tenki haree benefisiu ba povo ka lae?..foti osan ba halo habilitasaun social ba povo ok..foti osan halo irigasaun natar ok..mais foti gasta arbiru entao laliga lai…

HAKEREK NO HATÁN

Please enter your comment!
Please enter your name here