Distribuisaun Cesta Bázika. Imajen Tatoli/Dok.

DILI, 18 fevereiru 2021 (TATOLI)—Diretór Forum Organizasaun Naun Governamentál Timor-Leste, Daniel Santos do Carmo, hateten FONGTIL realiza diálogu entre Governu ho membru ONG sira hodi ko’alia no mellora distribuisaun cesta bázika iha ámbitu rekuperasaun ekonómia iha tempu pandémia COVID-19.

Notísia Relevante: Semana oin, Governu lansa Programa Cesta Bázika iha RAEOA

“Diálogu entre Governu ho membru ONG ne’e, ajuda mellora polítika Governu nian relasiona ho atribuisaun cesta bázika, nune’e komunidade bele hetan sira-nia direitu ho justu. Tanba bazea ba artigu 3(a-d) no Dekretu-Lei númeru 48/2020, 7 outubru, Governu prodús polítika ida hodi bele responde situasaun estraordinária ho implementasaun apoiu Cesta Bázika,” Daniel Santos do Carmo hateten bainhira halo abertura ba diálogu entre Governu ho sosiedade sivíl iha salaun FONGTIL, Caicoli, Dili, kinta ne’e.

Instrumentu xave ba dialógu ne’e, nia hateten, hodi observa kooperasaun ofisiál entre Governu ho ONG ba interese públiku, hodi asegura no garante interese públiku relasiona dezenvolvimentu nasionál, espesiálmente iha asuntu prosperiedade ba timoroan iha situasaun estraordináriu pandémia COVID-19.

Tanba, nia dehan, ezisténsia COVID-19 konsege rezulta impaktu ba movimentasaun no dezenvolvimentu iha Timor-Leste ne’e la’o la normál.

Nia hateten, situasaun ne’e obriga realidade ne’ebé eziste iha sosiadade nia le’et mak kompañia sira pauza sira-nia atividade, nesesidade báziku menus, no sirkulasaun osan menus.

“Entaun, Governu iha responsabilidade ekskluzivu hodi responde no sustenta eskluzivamente ezijénsia no nesesidade báziku timoroan nian iha situasaun pandemia COVID-19 ne’e ho programa cesta bázika,” nia dehan.

Entretantu Koordenadór Cesta Bázika, Osório Florindo, agradese ba FONGTIL ne’ebé realiza diálogu entre Governu ho membru ONG hodi ko’alia kona-ba lala’ok distribusaun cesta bázika nian.

“Durante hala’o distribuisaun cesta bázika kompañia sira la halo manipulasaun ba produtu ne’ebé sira atu distribui. Tanba, iha sira-nia kontratu osan no produtu ne’ebé atu fornese ba populasaun sira kompletu. Ne’ebé, laiha razaun se fornesedór sira atu fó menus ka ko’a produtu sira. Tanba  bainhira sira halo manipulasaun sei hetan sansaun administrativa,” Osório Florindo hateten.

Nia dehan, kompañia sira labele halo manipulasaun ba produtu sira tanba sira servisu hamutuk ho Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA) no Comissão Antí Corrupção (CAC) ne’ebé susar tebes kompañia halo manipulasaun.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here